Dağıstan və Azərbaycan quru sərhədlərinin açılması yollarını müzakirə edirlər

BAKI, 3 sentyabr — Sputnik. Dağıstan və Azərbaycan parlamentləri arasında yeni əməkdaşlıq sazişi imzalana bilər. Bunu Dağıstan Respublikası Xalq Məclisinin sədri Zaur Əsgərov Sputnik Azərbaycan-a müsahibəsində deyib.

Spiker ölkədə parlament seçkilərinin gedişini müşahidə etmək üçün MDB-dən olan beynəlxalq müşahidəçilər missiyasının tərkibində Azərbaycanda olub. Əsgərov qeyd edib ki, onlar Azərbaycanın çiçəklənməsində, burada sülh və əmin-amanlığın hökm sürməsində maraqlıdırlar.

"Ölkənizdə parlament seçkiləri demokratik şəraitdə keçdi, xalq öz iradəsini bildirdi, heç bir qanun pozuntusuna yol verilmədi, Dağıstan Xalq Məclisi Azərbaycan parlamenti ilə sıx əməkdaşlıq edir, o cümlədən, mövcud razılaşma çərçivəsində çox güman ki, biz yeni seçilmiş Azərbaycan Respublikasının parlamenti ilə yeni sazişə imza atacağıq", - Xalq Məclisinin sədri bildirib.

Qapalı sərhədlər əməkdaşlığa mane olur

Dağıstan Respublikası Xalq Məclisinin sədri onu da bildirib ki, o, Bakıda olarkən azərbaycanlı həmkarları ilə də mühüm məsələlərdən birini - quru sərhədinin açılmasını müzakirə edib. O qeyd edib ki, Azərbaycanla Dağıstan arasında böyük mədəni, tarixi və ticarət əlaqələri mövcuddur, ona görə də sərhədlərin bağlı olması əlaqələrin daha da inkişafına mane olur.

"Biz bu məsələni həll etmək üçün imkanlar axtarırıq ki, bunlar çarter avtobusları və ya dəmir yolu xətləri ola bilər ki, bu gün təyyarələr Mahaçqaladan Bakıya uçur, bu da vətəndaşlarımızın ölkənizə və əksinə səfər etməsinə şərait yaradır", - Əsgərov deyib.

Dağıstan rəsmisi əlavə edib ki, Dağıstan və Azərbaycan parlamentarilərinin iştirakı ilə işgüzar görüş və ya dəyirmi masa keçirmək planlaşdırılır.

Dağıstanlı şairin yubileyi Bakıda qeyd olunacaq

Əsgərov bildirib ki, ötən il Dağıstanda Dağıstan xalqının dahi oğlu, şair və yazıçı Rəsul Həmzətovun 100 illik yubileyi yüksək səviyyədə qeyd olunub. Onun sözlərinə görə, bu tədbir bütün ölkə üçün çox əhəmiyyətli idi.

"Rəsul Həmzətovun yubileyi Bakıda da yüksək səviyyədə qeyd olundu. Azərbaycan paytaxtında "Rus Evi"ndə Dağıstanın xalq şairinin 150 illik yubileyi şərəfinə eyni tədbirin keçirilməsini təklif etdik", - Dağıstan parlamentinin rəhbəri əlavə edib.

Digər maraqlı xəbərləri həmçinin Sputnik Azərbaycan-ın Teleqram kanalından izləyin.