BAKI, 28 avqust — Sputnik. Sentyabrın 24-25-də Moskvada Ümumrusiya Dəniz Konqresi keçiriləcək. Tədbir Rusiya Federasiyasının Sənaye və Ticarət və Nəqliyyat nazirlikləri, "FSUE Rosmorport", Rusiya Gəmiçilik Palatası və Dəniz Ticarət Limanları Assosiasiyasının dəstəyi ilə təşkil ediləcək.
Təşkilatçıların yaydığı məlumata görə, Konqresin işgüzar və sərgi proqramında 2000-dən çox iştirakçının, o cümlədən dəniz sənayesinin aparıcı şirkətlərinin 300-dən çox yüksək vəzifəli şəxslərinin, 15 ölkədən - Azərbaycan, Türkiyə, Çin, Hindistan, Vyetnam, İran, Myanma, BƏƏ, Malayziya, Belarus, Qazaxıstan, Türkmənistan və digərlərindən 150-dən çox nümayəndənin iştirakı gözlənilir.
Auditoriyanın əksəriyyətini dəniz texnikası istehsalçıları və təchizatçıları, gəmiqayırma və gəmi təmiri müəssisələrinin nümayəndələri təşkil edəcək. Konqresdə limanların, gəmiçilik, balıqçılıq və nəqliyyat-logistika şirkətlərinin, konstruktor bürolarının, layihə, elm və təhsil təşkilatlarının rəhbərləri və mütəxəssisləri iştirak edəcəklər.
Ümumilikdə, 200-dən çox məruzəçinin iştirakı ilə 25-dən çox işgüzar tədbir planlaşdırılır. Sessiyaların mövzuları müasir gündəliyə uyğun tərtib olunub və texnoloji suverenlik kontekstində donanmanın yenilənməsindən tutmuş sənayenin rəqəmsallaşmasına qədər ən aktual məsələlərin geniş spektrini əhatə edəcək.
Bundan əlavə, hibrid formatda "Rusiya-Hindistan" və "Rusiya-Çin" beynəlxalq biznes dialoqları, rusiyalı və xarici ekspertlərlə telekonfransların təşkili də nəzərdə tutulur.
Ümumrusiya Dəniz Konqresi Rusiya Federasiyasının dəniz və çay nəqliyyatı sənayesinin fəaliyyətində ən aktual məsələlərin müzakirəsi üçün səlahiyyətli platformadır. Bu, işgüzar əlaqələri inkişaf etdirmək, təcrübə mübadiləsi aparmaq və dəniz sənayesi təşkilatlarının imkanlarını təqdim etmək üçün yaxşı imkandır.
Tədbirin əsas məqsədləri Rusiyanın ən böyük dəniz regionlarının populyarlaşdırılması və regionlararası əməkdaşlığın gücləndirilməsi, Rusiya Federasiyasının bütün subyektlərinin müəssisələri arasında nəqliyyat və sənaye əməkdaşlığının inkişafı, dost ölkələrlə işləmək üçün əlverişli şəraitin yaradılması, dəniz sənayesinin ən aktual problemləri və effektiv həll yollarının inkişafıdır.
Qeyd edək ki, ilk Ümumrusiya Dəniz Konqresi 2022-ci il oktyabrın 3-4-də Moskvada keçirilib. Burada Rusiya Federasiyasının 82 subyektindən və 24 ölkədən 1500 iştirakçı iştirak edib, iki gün ərzində 230 məruzəçinin çıxışları dinlənilib.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.