BAKI, 27 avqust — Sputnik. Qazaxıstanın müasir şəraitdə enerji müstəqilliyini təmin etmək üçün atom elektrik stansiyasına (AES) alternativ yoxdur. Bunu energetika naziri Almasadam Satkaliyev hökumətin iclasında bildirib.
"Dünya praktikası göstərir ki, AES-in tikintisi dayandırılmış gücləri əvəz etmək və Qazaxıstanın enerji müstəqilliyini təmin etmək üçün yeganə düzgün həll yolu kimi görünür" - Satkaliyev bildirib.
Nazir əlavə edib ki, proqnozlara əsasən, 2035-ci ilədək Qazaxıstanda elektrik enerjisi istehlakı 152,4 milyard kilovat-saata çatacaq. Eyni zamanda, istismarın dayandırılması, köhnəlmənin artması və ekoloji tələblərin sərtləşdirilməsi kimi obyektiv amillər nəticəsində mövcud enerji mənbələrinin istehsalı 135 milyard kilovat-saatdan aşağı düşəcək.
"Bununla əlaqədar olaraq, 2035-ci ilə qədər ümumi quraşdırılmış gücü 26,5 giqavat olan yeni generasiya güclərinin istismara verilməsi zəruridir. Dünyada hazırda 61 nüvə reaktoru tikilir, onlardan 27-si Çində tikilir" - Satkaliyev bildirib.
Nazir onu da qeyd edib ki, Qazaxıstanda Balxaş gölündə ilk atom elektrik stansiyasının tikintisi layihəsinin həyata keçirilməsində mühüm mərhələ referendum olacaq.
"Bu tədbir ölkə əhalisinə öz fikirlərini bildirmək və enerji sənayesinin gələcək inkişaf yolunu müəyyən etmək imkanı verəcək" - deyə Satkaliyev vurğulayıb.
Avqust ayında Qazaxıstanda AES-lərin tikintisi ilə bağlı ötən ilin oktyabrından davam edən ictimai müzakirələr başa çatıb. Müzakirə çərçivəsində tədbirlər Petropavlovsk, Kokçetav, Kostanay, Ust-Kamenoqorsk, Çimkent, Türküstan, Karaqanda, Atırau, Semey, Pavlodar, Almatı və Astana kimi şəhərlərdə keçirilib.
2024-cü il iyunun sonunda Qazaxıstan prezidenti Kasım-Jomart Tokayev payızda bu mövzuda ümumxalq səsverməsi keçirmək niyyətində olduğunu bəyan edib. Məlumat verilib ki, Energetika Nazirliyi "Açıq normativ hüquqi aktlar" portalında "Alternativ enerji mənbələrindən istifadə haqqında" qanun layihəsinə dair sənəd dərc edib. Balxaş gölünün sahilində atom elektrik stansiyasının tikintisini təsdiqlənsə, 2035-ci ilə qədər onun tikintisinə 11,2 milyard dollar xərclənməsi planlaşdırılır.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.