BAKI, 24 avqust - Sputnik. Bir gün əvvəl girov böhranının baş verdiyi Volqoqrad vilayətində 19 saylı cəzaçəkmə müəssisəsi adi qaydada işləyir, istintaq hərəkətləri hələ də davam edir. Bu barədə RİA Novosti-yə regional Federal Penitensiar Xidmətin baş idarəsindən bildirilib.
"Koloniya artıq normal fəaliyyət göstərir. Orada istintaq hərəkətləri davam edir", - məlumatda deyilir.
Xatırladaq ki, cümə günü Rusiyanın Federal Penitensiar Xidməti Volqoqrad vilayətindəki 19 saylı koloniya məhbuslarının girov götürdüyü barədə məlumat yayıb.
Daha sonra snayperlər koloniya işçilərini girov götürən məhbusları zərərsizləşdirib və girovlar azad edilib.
Fövqəladə hadisə nəticəsində Federal Penitensiar Xidmətin 4 əməkdaşı həlak olub, daha 4 nəfər yaralanıb. İstintaq Komitəsi cinayət işi açıb.
"Zərərçəkənlərin vəziyyəti ağırdır", - agentliyin mənbəsi bildirib.
Bundan əvvəl səlahiyyətlilər müəssisədə baş vermiş hadisə nəticəsində xəsarət alan Federal Penitensiar Xidmətin əməkdaşlarının Surovikino Mərkəzi Rayon Xəstəxanasından Volqoqraddakı xəstəxanalara köçürüldüyünü bildirmişdilər. Bir xəstə 25 saylı təcili xəstəxanaya çatdırılıb. Üç xəstə 1 saylı Volqoqrad Regional Klinik Xəstəxanasında müalicə olunur.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.