BAKI, 20 avqust — Sputnik. Türkiyənin Rusiya ilə qaz qovşağının yaradılması ilə bağlı danışıqlarda problemi yoxdur, lakin proses vaxt aparır. RİA Novosti xəbər verir ki, bu barədə Türkiyənin enerji və təbii ehtiyatlar naziri Alparslan Bayraktar məlumat verib.
Ankara ümid edir ki, bu qovşaq ona qazın qiymətlərini müəyyən edən əsas mərkəzə çevrilməyə imkan verəcək. İnfrastruktura uyğun investisiyalarla Türkiyə təbii qaz idxalını indiki 50-dən 70-80 milyard kubmetrə çatdırmağı planlaşdırır. Bayraktar onu da qeyd edib ki, yaxın gələcəkdə Türkiyənin Qazprom və Türkiyənin BOTAŞ şirkəti ilə qovşağın yaradılması məsələsində qarşılıqlı fəaliyyəti davam etdiriləcək.
"Rusiya tərəfi ilə birlikdə Qaz Ticarət Mərkəzi üçün şirkət və ya platforma yaratmağı planlaşdırırıq. BOTAŞ İstanbul maliyyə mərkəzində "Qazprom"un tərəfdaşıdır. Biz EPİAŞ-ı da (Bazar Əməliyyatları İdarəsi) ora köçürürük. Rusiyalı tərəfdaşlarla heç bir problemimiz yoxdur. Qaz bu platformada mövcud olacaq və qiymət orada formalaşacaq", nazir bildirib.
Rusiya Dövlət Dumasının enerji komitəsinin rəhbəri Pavel Zavalnı iyunda Türkiyəyə səfərindən sonra bildirib ki, Türkiyədə qaz qovşağının tikintisi ilə bağlı qərarlar bu il veriləcək. O, layihənin etibarlı, təhlükəsiz olduğunu və sanksiyalara məruz qalmadığını vurğulayıb.
Türkiyə qaz qovşağının yaradılması ideyası ilk dəfə 2022-ci ilin oktyabrında elan edilib. "Şimal axını 1" və "Şimal axını 2" sualtı qaz kəmərlərində baş verən partlayışlardan sonra Rusiya prezidenti Vladimir Putin Rusiya qazının itirilmiş həcmlərini Qara dəniz regionuna yönəltməyi və digər ölkələrə, ilk növbədə Avropaya ixrac üçün Türkiyədə qaz qovşağı yaratmağı təklif edib.