BAKI, 12 avqust — Sputnik. Hər gün işdə istifadə etdiyimiz digər əşyaların da üzərində çoxlu mikrob var. Bu nəticələr Britaniyanın təmizlik agentliklərindən birinin sifarişi ilə aparılan araşdırma nəticəsində ortaya çıxıb.
"Daily Mail" bu barədə xəbər verib.
Belə ki, orta kompüter klaviaturasında mətbəxdəki zibil qabında olduğu qədər bakteriya var. Orta kompüter siçanı qapının qarşısına saldığımız ayaqaltıdan çirklidir. Orta ofis masası isə tualet oturacağından üç dəfə daha çirklidir.
Tədqiqat müəllifləri ofislərdəki müxtəlif obyektlərin səthindən mikroflora nümunələri götürüb və onları ən çirkli məişət əşyaları ilə müqayisə ediblər.
Mütəxəssis izah edib ki, masalar və klaviaturaların çirk olmasının səbəbi ondadır ki, biz onların arxasında gündəlik səkkiz saat vaxt sərf edib işləyirik. Eyni zamanda biz iş yerimizdə həm də yeyib-içirik.
Ofis işçiləri mütəmadi olaraq masalarını, noutbuklarını, planşetlərini, telefonlarını, klaviaturalarını, siçanlarını, printerlərini dezinfeksiya etməlidirlər, çünki bütün bu əşyalar potensial infeksiya daşıyıcılarıdır.
Əvvəllər fin alimləri ofislərdəki bitkilərin işçilərin özlərini daha yaxşı hiss etmələrinə kömək etdiyini və müxtəlif xəstəlik risklərini azaltdığını müəyyən etmişdilər.