BAKI, 9 avqust — Sputnik. Çində bir şirkət Şərq təqviminə görə İt ilində doğulmuş işçiləri işə götürməkdən imtina edir,. Bu barədə South China Morning Post yazır.
Bundan əvvəl Çinin cənubundakı Quandun əyalətində yerləşən "Sanxing Transportation" ofis işçisi vəzifəsi üçün vakansiya elan edib. Elana əsasən, İt ilində doğulan namizədlər bu vəzifəyə müraciət etməməlidir.
"Sanxing Transportation" şirkətinin əməkdaşlarından biri mediaya bildirib ki, şirkət rəhbəri Əjdaha ilində doğulduğu üçün İt ilində anadan olan namizədlərin müraciətlərini rədd edib.
"Əjdahalar və itlər yaxşı yola getmirlər", şirkət işçisi Çindəki ənənəvi inancları xatırladaraq bildirib.
Nəşr qeyd edib ki, inanclara görə Əjdaha su elementinə, İt isə od elementinə aiddir. Bundan əlavə, Çin inanclarına görə, İt ilində doğulmuş insanlar kinlidir və Əjdaha ilinin nümayəndələrinin karyeralarına uğursuzluq gətirə bilərlər.
Qəzet əlavə edib ki, Çindəki sosial media istifadəçiləri şirkəti xurafatlara həddindən artıq inandığına görə qınayıblar.
Son onilliklərdə İt ili 2018, 2006, 1994, 1982, 1970, 1958, 1946-cı illərdə düşüb. Əjdaha ili 2024, 2012, 2000, 1988, 1976, 1964-cü illərdə qeyd edilib.