BAKI, 8 avqust — Sputnik. Macarıstanın "MVM" şirkəti "Sudja" qazölçmə stansiyası yaxınlığındakı vəziyyət fonunda Rusiyadan qazı bir neçə marşrut üzrə fasiləsiz alır. Bu barədə RİA Novosti-yə şirkətdən bildirilib.
"Macarıstana təbii qazın tədarükü davamlıdır. "MVM CEEnergy" müqaviləli təchizatçılarla əməkdaşlıq edərək bir neçə marşrut üzrə təbii qazın alınmasını davam etdirir və müqavilə öhdəliklərinin yerinə yetirilməsini təmin edir", - şirkətin mətbuat xidmətindən bildirilib.
Rusiya Silahlı Qüvvələrinin Baş Qərargah rəisi Valeri Gerasimov bildirib ki, avqustun 6-da səhər saat 5.30-da Ukrayna Silahlı Qüvvələrinin min nəfərdən ibarət bölmələri Sudjanski rayonunda əraziləri ələ keçirmək məqsədilə hücuma keçib. O qeyd edib ki, onların Rusiya ərazisinə doğru irəliləməsi dayandırılıb. Həmçinin sərhədyanı Sudja şəhəri Ukrayna tərəfindən dəfələrlə kütləvi atəşə məruz qalıb. Yerli icra başçısı şəhərdəki vəziyyəti "çox gərgin" adlandırıb.
Sudja qaz ölçmə stansiyasından keçən tədarük marşrutu hazırda Rusiya qazının Ukrayna ərazisindən Avropaya tranziti üçün yeganə yoldur. "Qazprom" ötən il bu marşrutla təxminən 14,9 milyard kubmetr qaz tədarük edib ki, bu da Aİ istehlakının təxminən 4,5%-ni təşkil edib.