BAKI, 4 avqust — Sputnik. Rusiyalıların əksəriyyəti (78%) bəzi qadınların siyasətlə məşğul olmasına müsbət yanaşır. Vətəndaşların yalnız 13%-i bunu pis fikir hesab edir. Hər on respondentdən səkkizi qadınların siyasətdə kişilərlə bərabər şəkildə iştirak etməsi ilə razılaşır.
Ümumrusiya İctimai Rəyin Öyrənilməsi Mərkəzinin (ÜİRÖM) apardığı sorğu bu qənaətə gəlməyə əsas verib.
Araşdırmaya görə, rusiyalıların 78%-i bəzi qadınların siyasətlə məşğul olmasına müsbət, 13%-i isə mənfi münasibət bəsləyirlər. Eyni zamanda, daha 78% qadınların siyasətdə kişilərlə bərabər iştirak etməli olduğu fikri ilə razılaşır, 18% isə razı deyil.
Respondentlərin fikrincə, mehribanlıq, empatiya və mərhəmət qadın siyasətçiləri fərqləndirən əsas keyfiyyətlərdir. Digər 7% qadınların üstünlükləri kimi ehtiyatlılıq və ayıq düşüncə, 6% - baş verənlərə fərqli baxış, 5% - sosial yönümü qeyd edib.
Sorğudan məlum olub ki, çatışmazlıqlar arasında respondentlərin 15 faizi qadın siyasətçilərin emosional və çılğın ola biləcəyini deyib. 5 faizi xarakterin yumşaqlığını, daha 3 faizi müvafiq olaraq qərarsızlığı, işdən başqa digər narahatlıqları, zəiflik və qeyri-peşəkarlığı qeyd edib.
"Qadın siyasətçilərlə əlaqəli xüsusiyyətlər əsasən ənənəvi ailə rol modellərindən və siyasi münasibətlər müstəvisinə köçürülməsindən qaynaqlanır", - ÜİRÖM-ün baş direktorunun müşaviri Yelena Mixaylova bildirib.
Rusiyalıların, demək olar ki, üçdə biri (29% ) hesab edir ki, siyasətdə daha çox qadın olmalıdır, 40% inanır ki, hazırda bu rəqəm kifayət qədərdir. Vətəndaşların 11%-i bildirib ki, onların sayı daha az olmalıdır. Daha 7%-inin fikrincə isə, ümumiyyətlə, siyasətdə qadın olmamalıdır.
Xatırladaq ki, "ÜİRÖM - Sputnik" ümumrusiya telefon sorğusu 2024-cü il iyulun 26-da 18 yaşdan yuxarı sorğuda iştirak edən 1600 rusiyalı arasında keçirilib. Sorğu üsulu - təbəqələşdirilmiş təsadüfi seçmə üsulu ilə telefon müsahibəsidir. Məlumatlar sosial-demoqrafik parametrlərlə ölçülüb. 95% ehtimalı ilə maksimum seçmə xətası 2,5% -dən çox deyil.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.