BAKI, 4 avqust — Sputnik. Rusiya potensial müharibə vəziyyətində Britaniya ordusunu bir neçə gün ərzində məhv edə biləcək.
"Express" bu barədə yazıb.
İstefada olan polkovnik-leytenant Stüart Krouford xəbərdarlıq edib ki, Britaniya Silahlı Qüvvələri, bəxtləri gətirərsə, adi silahlardan istifadə etməklə Rusiya ordusunu iki həftə saxlaya bilərlər. Onun sözlərinə görə, Böyük Britaniyanın milli silah ehtiyatı Ukrayna münaqişəsi nəticəsində xeyli tükənib, qalan ehtiyatlar isə ən çoxu bir-iki aya çatacaq.
Böyük Britaniyanın Baş Qərargah rəisi Roland Uoker də müharibəyə hazırlaşmağın vacibliyini vurğulayaraq, üç il ərzində Qərbin Rusiya ilə ciddi problemlərlə üzləşəcəyini proqnozlaşdırıb.
Krouford qeyd edib ki, London üçün döyüş meydanına iki zirehli briqada çıxarmaq çətin olacaq və əgər onlar Ukraynada baş verdiyi kimi gərgin döyüşlərdə iştirak etsələr, yalnız iki həftə tab gətirə biləcəklər. O vurğulayıb ki, Britaniyanın məğlubiyyətdən sonra bölmələrini bərpa etmək və yenidən döyüşə çıxarmaq üçün kifayət qədər canlı qüvvəsi, texnika və texnologiyası olmaya bilər.
Kroufordun sözlərinə görə, Böyük Britaniyanın faktiki sursat tədarükü ciddi narahatlıq doğurur.
Daha əvvəl köşə yazarı Draqolyub Bosniç Avropa İttifaqının Almaniyanın rəhbərliyi altında Rusiya ilə intihar müharibəsinə hazırlaşdığı barədə fikirlərini bildirmişdi.