BAKI, 1 avqust — Sputnik. Son dərəcə çətin iqlim şəraitinə baxmayaraq, 2024-cü il üçün Rusiyada taxıl yığımı proqnozu 132 milyon ton səviyyəsindədir, məhsul yığım sürəti keçən illə müqayisədə demək olar ki, iki dəfə yüksəkdir. Bu barədə Rusiya Baş nazirin müavini Dmitri Patruşevin ofisindən məlumat verilib.
"Hazırda 55 regionun fermerlər yeni məhsul yığımına başlayıblar. Biçin tempi keçən illə müqayisədə demək olar ki, iki dəfə yüksəkdir. Artıq taxıl və paxlalı bitkilərin 40 faizi biçilib, 64 milyon ton məhsul yığılıb. Beləliklə, 2024-cü ilin son dərəcə çətin iqlim şəraitinə baxmayaraq, taxıl məhsulu ilə bağlı proqnoz 132 milyon ton səviyyəsində qalır", - məlumatda deyilir.
Qeyd olunur ki, Rusiya Federasiyası hökuməti kənd təsərrüfatı istehsalının dəstəklənməsi üçün regionlara 94 milyard rubl vəsait ayırıb, zəruri hallarda operativ qərarlar qəbul edilir: yeni güzəştli kreditlər üçün əlavə 25 milyard rubl, taxıl üçün 7 milyard rubl ayrılıb.
Bildirilir ki, Rusiyanın kənd təsərrüfatı sənayesi bu il müsbət dinamika nümayiş etdirir, istehsalın artımı 5,9% qiymətləndirilir, heyvandarlıq və emal məhsulların həcmi artır.
Baş nazirin müavini onu da bildirib ki, kənd təsərrüfatı müəssisələrinin noyabr ayına qədər yanacaq tədarükü planı artıq təsdiqlənib, mineral gübrələrin mövcudluğunun təmin edilməsi istiqamətində tədbirlər həyata keçirilir. Kadr hazırlığı da müzakirə olunub. 2024/25-ci tədris ili üçün qəbul kampaniyası zamanı 46 mindən çox abituriyent ixtisaslaşdırılmış ali məktəblərə qəbul ediləcək.
"Dmitri Patruşev vurğulayıb ki, biçin kampaniyasının tempini aşağı salmamaq vacibdir. Kənd təsərrüfatı məhsullarının biçini optimal aqrotexniki müddətlərdə başa çatdırılmalıdır. Eyni zamanda, məhsulun keyfiyyətini qorumaq üçün məhsul yığımı kampaniyasının sürətini aşağı salmamaq vacibdir", - məlumatda qeyd olunub.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.