BAKI, 1 avqust — Sputnik. Azərbaycan Rusiya şirkətlərindən Qarabağda və Şərqi Zəngəzurda işləmək üçün 24 layihə üçün müraciət alıb. Bu barədə İqtisadiyyat Nazirliyinə verilmiş sorğuya cavabda bildirilir.
"Bu günə kimi Rusiya şirkətləri tikinti, ticarət, kənd təsərrüfatı, sənaye və xidmət sahələrini əhatə edən 24 layihə üçün müraciət ediblər" - məlumatda deyilir.
Həmçinin bildirilir ki, Rusiya-Azərbaycan Müştərək Müəssisəsi (MM) tərəfindən "Araz Vadisi İqtisadi Zonası"nın sənaye parkında işğaldan azad edilmiş ərazilərdə istifadə olunan avtomobillərə, eləcə də tranzit nəqliyyat vasitələrinə xidmət göstərəcək texniki xidmət mərkəzi yaradılıb.
Azərbaycan Rusiya turizminə sərmayə qoyur
O da vurğulanıb ki, 1995-2023-cü illər ərzində Rusiya Azərbaycan iqtisadiyyatına birbaşa 9,1 milyard dollar sərmayə qoyub. Həmin dövrdə Azərbaycan investisiyalarının həcmi isə 1,2 milyard dollar təşkil edib:
"Azərbaycan şirkətləri Rusiyanın müxtəlif regionlarında turizm, kənd təsərrüfatı, tikinti və digər sahələrdə investisiya layihələrini həyata keçirirlər".
Nazirlik bildirib ki, Rusiya bazarına ənənəvi tərəvəz və meyvələrlə yanaşı, Azərbaycanın polietilen, propilen və polipropilen kimi sənaye məhsulları da çıxarılır. Son vaxtlar emal olunmuş kənd təsərrüfatı məhsulları, alkoqollu və alkoqolsuz içkilərə xüsusi tələbat olub:
"Rusiyanın iri mağazalar şəbəkəsi ilə aparılan danışıqlar nəticəsində Azərbaycan mənşəli emal və konservləşdirilmiş məhsullar ixrac olunur".
Nazirliyin məlumatında o da qeyd olunur ki, Azərbaycanın özəl şirkətləri son illər Rusiyanın turizm sektoruna fəal şəkildə sərmayə qoyurlar:
"2021-ci ilin dekabrında Jeleznovodsk şəhərində beşulduzlu sanatoriya, bu yaxınlarda isə Kislovodskda "İstoçnik" sanatoriyası açılıb. Bundan əlavə, Yessentukidə Azərbaycan sərmayəsi ilə tikilmiş "İstoçnik" sanatoriya-turizm mərkəzi fəaliyyət göstərir".