Qubada həm xarici komandaların, həm də Azərbaycan klubunun iştirakı ilə 3x3 basketbol üzrə Dünya Qadın Seriyasının mərhələsi keçirilib.
Meydan sahiblərini "Baku Flames" klubu təmsil edib. Bu komandanın tərkibində Sali Əl-Xuri, Nailə Əlisultanova, Ləman İbrahimova və Yeva Nastakalova çıxış ediblər.
Azərbaycan komandası qrup mərhələsinin hər üç matçında məğlub olaraq uğursuz çıxış edib. Xüsusilə, startda Hollandiya komandasına 4:21 hesabı ilə uduzmuş "Baku Flames" bundan sonra Çin (U24) komandasına 2:21 hesabı ilə daha böyük hesabla məğlub olub. Nəticədə meydan sahibləri avstraliyalılara 3:21 hesabı ilə də uduzublar.
Dünya Seriyasının Quba mərhələsinin qalibi final matçında Hollandiya yığmasını 21:15 hesabı ilə məğlub edən Avstraliya komandası olub.
Onu da əlavə edək ki, "Baku Flames" klubu Dünya Seriyasında 46-cı yerdədir.