BAKI, 19 iyul — Sputnik. İran qazının Ermənistana ixracı yaxın gələcəkdə iki dəfə artacaq. Bu barədə İranın SNN agentliyinə İranın Ermənistandakı səfiri Mehdi Sobhani bildirib.
O xatırladıb ki, bir il əvvəl Ermənistan və İran "Elektrik üçün qaz" sazişini 2030-cu ilə qədər uzadıb. Belə ki, Tehran hər il Ermənistana 360 milyon kubmetr qaz ixrac edir, əvəzində isə elektrik enerjisi idxal edir.
"Biz həmçinin bir neçə ay ərzində istifadəyə veriləcək Ermənistandan İrana üçüncü elektrik ötürücü xəttini demək olar ki, son mərhələyə çatdıra bilmişik və biz Ermənistandan elektrik enerjisi idxalını iki dəfə artıra biləcəyik", - səfir bildirib.
O qeyd edib ki, hər gün 400 yük maşını hərəkət edir: "İran və Ermənistan arasında ticarət dövriyyəsini 711 milyon dollara çatdırmaq mümkün olub".
Sobhani vurğulayıb ki, Ermənistan Aİİ üzvü olduğu üçün İran üçün mühüm bazardır.
Diplomat qeyd edib ki, İranla Ermənistan arasında münasibətlər coğrafi və strateji mövqeyə görə xüsusi əhəmiyyət kəsb edir və bu ölkələr arasında 46 kilometrlik sərhəd var ki, bu da regional təhlükəsizliyin möhkəmləndirilməsində mühüm rol oynayır.
Həyata keçirilən birgə layihələr sırasında o, infrastruktur, yolların tikintisi, qaz və elektrik enerjisi mübadiləsinin genişləndirilməsi kimi proqramların adını çəkib.
Xatırladaq ki, Ermənistan və İran 2009-cu ildə qaz müqabilində qarşılıqlı elektrik enerjisi tədarükünə başlayıb. 2023-cü ilin avqustunda ölkələr mübadilə tədarükünün genişləndirilməsini nəzərdə tutan Qaz-elektrik enerjisi sazişini 2030-cu ilə qədər uzadıb. Hazırkı müqaviləyə əsasən, Ermənistan hər 3 kilovat-saat elektrik enerjisinə görə İrandan 1 kubmetr qaz alır. Ermənistan üçün fayda ondan ibarətdir ki, proqramda iştirak edən elektrik stansiyaları (ErCHPP və Hrazdan İstilik Elektrik Stansiyası) 1 kubmetrdən 3 deyil, 4-4,5 kVt/saat elektrik enerjisi istehsal edir (beləliklə, Ermənistanda 1-1,5 kVt/saat qalır). İran ölkənin şimal-qərb bölgələri üçün yeni elektrik stansiyalarının tikintisinə ehtiyac olmadan əlavə elektrik enerjisi əldə etdiyi üçün sazişdən faydalanır.