BAKI, 16 iyul - Sputnik. Hazırda Bakıda təxminən 2 000-ə yaxın binanın su anbarları yuyulmur və təmiz deyil.
“Report” xəbər verir ki, bunu Dövlət Su Ehtiyatları Agentliyinin İri Şəhərlərin Birləşmiş Su Təchizatı Xidmətinin şöbə müdiri Cəmil Babayev deyib.
O bildirib ki, Mənzil-Tikinti kooperativlərində (MTK), təhsil ocaqlarında, ictimai iaşələrdə su anbarları, çənlərin yuyulması həyata keçirilmir: “Təbii ki, daha çox şikayət MTK-lar ilə bağlıdır. Bəzi hallarda vətəndaşlar suyun çirkli, tərkibində çöküntü və sair maddələr olması ilə bağlı şikayət edirlər. Həmin zaman suyun yoxlanışı həyata keçirilir və keyfiyyətində problem olmadığı aşkarlanır. Səbəb isə əksər hallarda su anbarlarının yuyulmaması olur”.
Şöbə müdiri qeyd edib ki, su anbarlarının yuyulmasını istəyənlər bu işlə məşğul olan MMC-lərə müraciət edə bilərlər və işin keyfiyyətli həyata keçirilməsinə nəzarət etmək üçün Agentlik tərəfindən nümayəndə təyin oluna bilər.