BAKI, 14 iyul - Sputnik. Yaponiyanın Yamaqata prefekturasının rəhbərliyi yerli sakinləri gündə ən azı bir dəfə gülməyə çağırıb. Lenta.Ru xəbər verir ki, müvafiq qanunu irəli sürən ölkənin Liberal Demokrat Partiyasıdır.
Təşkilat nümayəndələrinin fikrincə, hər gün gülmək sakinlərin fiziki və psixi sağlamlığını yaxşılaşdıracaq. Bundan əlavə, partiya işəgötürənləri iş yerində əyləncə üçün əlverişli atmosfer yaratmağa çağırıb.
Qətnamə müəllifləri bu təşəbbüsü Yamaqata Universitetində aparılan tibbi araşdırmanın nəticələri ilə izah ediblər. Təhlildən belə çıxır ki, gülüş sağlamlığı yaxşılaşdırmaqla yanaşı, insanların ömrünü də uzadır. Partiya gülüşün insanların səriştəsini, açıqlığını və vicdanını artırdığını müəyyən edən digər elmi işlərə də istinad edib.
Yaponiyanın Kommunist və Konstitusiya Demokratik Partiyasının üzvləri artıq belə yeniliklərin əleyhinə səs verib, Liberal Demokratları vətəndaşların təbii hüquqlarına və daxili azadlıqlarına hücumda ittiham ediblər.
Sonuncular isə qeyd edib ki, qətnamə insanları gülməyə məcbur etmir, sadəcə olaraq gülməyə sövq edir.
Liberal Demokrat Partiyası diqqəti ona cəlb edib ki, qəbul edilmiş qanun tələblərə əməl etməməyə görə cəza nəzərdə tutmur.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.