BAKI, 12 iyul — Sputnik. Rusiya Xarici İşlər Nazirliyinin rəsmi nümayəndəsi Mariya Zaxarova Ukrayna Prezidenti Vladimir Zelenski ilə Rusiya Prezidenti Vladimir Putini səhv salan və sözü sonuncuya verən ABŞ Prezidenti Co Baydeni ələ salıb.
"aif.ru" saytı bu barədə yazıb.
Hadisə Baydenin NATO sammitində Şimali Atlantika Alyansı liderləri qarşısında çıxışı zamanı baş verib.
"İndi isə sözü qətiyyəti qədər cəsarəti olan Ukrayna prezidentinə vermək istərdim. Xanımlar və cənablar, Prezident Putin" - Bayden çıxış edərkən səhvə yol verib.
Zaxarova ABŞ prezidentinin bəyanatına cavab olaraq onu "Rusiyayönlü namizəd" adlandırıb.
"Mənə elə gəlir ki, bədnam "Rusiyanın Amerika seçkilərinə müdaxiləsi" artıq gizlədilə bilməz – "Kreml əli" ilə idarə olunan rusiyapərəst namizəd göz önündədir. Hillari Klintonun "Amerika demokratiyasına hücumu" ilə bağlı isterikasını və Dövlət Departamentinin "yerli terrorçuların" sui-qəsdinin üzə çıxarılması ilə bağlı hesabatını gözləyirik" - Diplomat özünün "Teleqram" kanalında yazıb.
NATO sammitindən sonra keçirilən mətbuat konfransında Bayden növbəti dəfə səhv danışıb. Belə ki, 81 yaşlı Bayden ABŞ-ın vitse-prezidenti Kamala Harrisin Ağ Evə rəhbərlik etməyə uyğun olduğunu deyib, lakin Kamala Harrisi "Donald Tramp" adlandırıb.
Tramp buna cavab olaraq deyib ki, Bayden sələfi ilə bağlı dəlilik sindromu yaşayır.