BAKI, 9 iyul — Sputnik. COP29 tədbirlərinin keçirilməsi zamanı ölkədəki ümumi təhsil müəssisələrində tədrisin dayanması ilə bağlı hazırda müvafiq bir qərar yoxdur.
Sputnik Azərbaycan xəbər verir ki, bunu Məktəbəqədər və Ümumi Təhsil üzrə Dövlət Agentliyinin direktor müavini Orxan Abbasov bu gün jurnalistlər üçün keçirilən brifinqdə deyib.
"Biz hazırda sentyabrın 15-nə hazırlaşırıq" - o qeyd edib.
Xatırladaq ki, ictimaiyyətdə noyabr ayında, COP29-un keçirildiyi müddətdə məktəblərin iki həftəlik bağlanaraq onlayn formata keçməsi barədə şayiələr yayılıb.
Qeyd edək ki, Azərbaycan Prezidenti İlham Əliyev hökumətin COP29-la bağlı keçirdiyi ilk iclasda deyib ki, Bakı iki həftə ərzində təqribən 70-80 min xarici qonağı qarşılayacaq.
Məlumat üçün onu da bildirək ki, COP29 bu ilin noyabrında baş tutacaq. Azərbaycanın ev sahibliyi edəcəyi COP29 bu il Bakı Olimpiya Stadionunda keçiriləcək.
COP29 BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasıdır (COP29).