BAKI, 5 iyul — Sputnik. Pakistan və Rusiya arasında münasibətlər iki ölkənin maraqlarına uyğun olaraq qarşılıqlı faydalı əsasda inkişaf edir. Bunu jurnalistlər üçün keçirdiyi brifinqdə Pakistan Xarici İşlər Nazirliyinin rəsmi nümayəndəsi Mümtaz Zəhra Baloç deyib.
"Pakistan və Rusiya Federasiyası arasında ikitərəfli əməkdaşlığın bir sıra istiqamətləri, o cümlədən iqtisadiyyat və ticarət, enerji, kommunikasiyalar və regional məsələlər üzrə məsləhətləşmələr intensivləşib", - diplomat Rusiya prezidenti Vladimir Putinlə Pakistanın baş naziri Şahbaz Şərif arasında Şanxay Əməkdaşlıq Təşkilatının sammitində Astanada keçirilən görüşlə bağlı sualı cavablandırarkən vurğulayıb.
"İki lider arasında aparılan müzakirələr Rusiya və Pakistanın qarşılıqlı faydası üçün ümumi əsas tapmaq səylərimizin bir hissəsi idi", - Baloç bildirib.
Pakistanın ŞƏT-ə üzvlüyü ilə bağlı Xarici İşlər Nazirliyinin rəsmi nümayəndəsi qeyd edib ki, bu təşkilatda iş İslam Respublikasının maraqlarına cavab verir.
"ŞƏT regional əməkdaşlığın və qarşılıqlı fəaliyyətin təşviqinə və ümumi problemlərin birgə həlli yollarının tapılmasına yönəlib", - o qeyd edib.
Rusiya prezidenti iyulun 3-də Astanada Şahbaz Şəriflə görüşündə Rusiya-Pakistan münasibətlərinin inkişafında müsbət dinamikanı və iki ölkə arasında ticarət dövriyyəsinin artımını qeyd edib.
"Ölkələrimiz arasında münasibətlər inkişaf edir və biznes doğru şəkildə inkişaf edir, ticarət dövriyyəsinin artımını qeyd edirəm və burada bizim perspektivlərimiz çox yaxşıdır", - Putin Şəriflə söhbətində deyib.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.