BAKI, 5 iyul — Sputnik. Azərbaycan tibbi və sağlamlıq turizmini fəal şəkildə inkişaf etdirir. Bu gün 20 ölkədən olan vətəndaşlar əlverişli prosedurlar üçün respublikaya gəlirlər.
Bu barədə turizm üzrə ekspert Ceyhun Aşurov və Azərbaycan Sağlamlıq və Termal Turizmə Dəstək Assosiasiyasının sədri Ruslan Quliyev Sputnik Azərbaycan Multimedia Mətbuat Mərkəzinin təşkil etdiyi "Azərbaycanda müalicə-sağlamlıq turizmi: yeni layihələr və təkliflər" mövzusunda keçirilən mətbuat konfransında məlumat verib.
Tibbi turizm
Aşurovun sözlərinə görə, Azərbaycanın təklif etdiyi sağlamlıq və tibbi turizmi xidmətləri yüksək rentabelliyi ilə seçilir.
"Ölkəyə müalicə məqsədi ilə gələn əcnəbilər ənənəvi səfər edən turistlərdən 10 dəfə çox pul xərcləyirlər", - ekspert qeyd edib.
Müalicə xərclərinin yüksək olmasına baxmayaraq, onlar digər ölkələrlə müqayisədə xeyli aşağıdır. Azərbaycanlı həkimlər Türkiyədə və Avropada təhsil aldıqdan sonra lazımi təcrübə və ixtisaslara malik olurlar, lakin onlar 30-40% daha ucuz xidmət göstərirlər. Bəzi yerli klinikalarda ABŞ-ın "JCI" sertifikatı var ki, bu da xarici xəstələr üçün vacibdir. Azərbaycanda müasir avadanlıqlarla təchiz edilmiş çox sayda klinikalar fəaliyyət göstərir.
"Mövcud vəziyyəti təhlil edərkən bu sahədə uyğunlaşmış işin olmadığını qeyd etmək olar. Əcnəbilər ölkəyə fərqli həkimlərin reklamı sayəsində gəlirlər, lakin hələlik heç bir klinika əcnəbi xəstələrin qəbulu üzrə ixtisaslaşmış mərkəz kimi özünü tam şəkildə göstərə bilmir", - ekspert bildirib.
Tibbi turistlər arasında əsasən plastik cərrahiyyə, stomatoloji prosedurlar və sağlamlıq üçün minimum riski olan digər tibbi xidmətlərlərdən keçmək məqsədilə Rusiyadan, Mərkəzi Asiya və digər şərq ölkələrindən Azərbaycana səfər edən qonaqlar var.
Mütəxəssis qeyd edib ki, yerli hotellərdə qalmaq ucuz başa gəlir. Orta hesabla bir günlük hotel çeki heç 600 manatı keçmir, bu isə qonşu ölkələrlə müqayisədə 20-30% ucuzdur.
Müalicə və sağlamlıq turizmi
Azərbaycan Müalicə və Termal Turizmə Dəstək Assosiasiyasının sədri xatırladıb ki, hələ sovet dövründə respublikada sağlamlıq turizmi mövcud olub. Müasir dövrdə Qarabağ bölgəsində və Şərqi Zəngəzurda sağlamlıq və tibbi turizmin inkişafı üçün böyük perspektivlər var. Xüsusilə, orada velnes və spa turizminin, eləcə də kulinariya, stomatoloji, reabilitasiya, idman və sosial turizmin inkişaf perspektivləri mövcuddur.
Quliyevin sözlərinə görə, ölkədə sağlamlıq turizmi sahəsində mövcud olan hər bir məhsul unikaldır və analoqu yoxdur. Məsələn, Naxçıvanda Duzdağ, Naftalandakı müalicəvi neft, Qalaaltı və Lənkərandakı mineral bulaqlar sağlamlıq turizminin müxtəlif seqmentlərini təmsil edir. Qalaaltı və Lənkəranın suyu Avropa keyfiyyət sertifikatını alıb.
Azərbaycan beynəlxalq platformalarda uğurla təmsil olunur. Naftalan şəhərinin bir neçə istirahət zonası "Eurospa" siyahısına daxil edilib. Quliyev qeyd edib ki, bütün bunlar xarici turistləri qəbul edərkən inamı artırır və bu, göstərilən xidmətlərin keyfiyyətinin göstəricisidir.
Lakin ölkə, əcnəbiləri cəlb etmək potensialından tam istifadə etmir. Turistlərin ümumi sayının 2%-dən az hissəsi müalicə üçün Azərbaycana gəlir ki, bu da digər ölkələrin göstəricilərindən xeyli aşağıdır. Ona görə də Azərbaycanda tibbi turizmi hələ formalaşma mərhələsindədir.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.