BAKI, 1 iyul — Sputnik. İyunun 30-da Fransada keçirilən parlament seçkiləri ölkə Prezidenti Emmanuel Makron üçün "şəxsi alçaldılmaya" çevrilib.
Bu barədə "Politico" xəbər verib.
Materialın müəllifləri bildiriblər ki, Makron üçün parlament seçkilərinin birinci turunda uğursuzluq onun 7 il əvvəl prezident kürsüsünə yüksəlməsi qədər heyrətamiz olub.
"Politico"nun məqaləsi "Makron artıq bitdi" adlanır.
Nəşr qeyd edib ki, Fransa "Marin Le Penin "Milli Birlik" partiyasının parlamentdə səsvermənin birinci turunda qazandığı təsirli qələbəsindən sonra ilk dəfə olaraq ifrat sağçı hökumət qurmağa" həmişəkindən daha yaxındır.
İkinci tur iyulun 7-də baş tutacaq. Əgər onlar qalib gəlsələr, ölkəni "Vladimir Putinə simpatiyası ilə ad çıxaran siyasətçilər idarə edəcəklər".
Belə olan halda material müəllifləri Avropa İttifaqının dağılacağını, miqrasiyaya qarşı müharibəni və NATO-dan çıxmağı proqnozlaşdırıblar.
Bundan əvvəl Fransada keçirilən parlament seçkilərinin birinci turunda Marin Le Penin sağçı "Milli birlik" partiyasının və onunla müttəfiq qüvvələrin 33,4 faiz səs toplayaraq qalib gəldiyi bildirilmişdi.