BAKI, 28 iyun — Sputnik. Gürcüstan hakimiyyəti müəyyən qüvvələrin ölkədə Ukrayna ssenarisini təkrarlamaq cəhdlərinin qarşısını alıb və gələcəkdə belə hadisələrin baş verməsinə imkan verməyəcək. Bunu Gürcüstanın baş naziri İrakli Kobaxidze parlamentdə görülən işlər barədə hesabat verərkən deyib.
"Ukraynalaşmaya, Gürcüstanda Ukrayna ssenarisini, Maydanı inkişaf etdirmək cəhdlərinə gəlincə, biz bu barədə dəfələrlə danışmışıq. Təəssüf ki, konkret siyasi qüvvələr açıq şəkildə müvafiq təbliğata cəlb olunub. Bu, əlbəttə ki, ölkəmizə təzyiqi artırıb, lakin bu illər ərzində biz müvafiq ssenarinin qarşısını uğurla ala bildik və əlbəttə ki, gələcəkdə bunu edə biləcəyimizə əminik", Kobaxidze deyib.
Baş nazir vurğulayıb ki, Gürcüstanın bu cür təhdidlərlə mübarizədə uğurlu təcrübəsi var və hakimiyyət heç kimə Ukraynanı "belə çətin vəziyyətə" aparan oxşar ssenarilər hazırlamaq imkanı verməyəcək.
Gürcüstan hakimiyyəti dəfələrlə, xüsusən də Ukraynada silahlı münaqişə başlayandan dərhal sonra müəyyən qüvvələrin ölkəni Rusiya ilə qarşıdurmanın "ikinci cəbhəsinə" çəkmək cəhdləri və istəyini bəyan edib. Eyni zamanda, hakim "Gürcü Arzusu – Demokratik Gürcüstan" partiyasının liderləri vurğulayırlar ki, münaqişəyə daxil olmaq Gürcüstan üçün fəlakətli nəticələrə gətirib çıxaracaq və rəhbərliyin vəzifəsi ölkədə sülhü qorumaqdır.