BAKI, 11 iyun - Sputnik. Rusiya Türkiyə ilə münasibətlərin inkişafına məmnunluqla baxır. Bunu Rusiya prezidenti Vladimir Putin deyib.
“Biz Türkiyə Respublikası ilə əlaqələrin inkişafını məmnunluqla qeyd edirik. Bütün bunlar təbii ki, dostumuz Türkiyə Cümhuriyyətinin Prezidentinin rəhbərliyi və birbaşa dəstəyi ilə baş verir”, - Putin Türkiyənin xarici işlər naziri Hakan Fidanla görüşdə deyib.
RF lideri bildirib ki, Rusiya Türkiyənin Qara dənizdə gəmiçiliklə bağlı bütün təşəbbüslərini diqqətlə və hörmətlə nəzərdən keçirir:
“Biz Türkiyə Respublikasının bu yolda bütün təşəbbüslərini diqqətlə və böyük hörmətlə nəzərdən keçiririk və sizinlə əlaqə saxlayacağıq”.
Vladimir Putin Türkiyənin xarici işlər naziri Hakan Fidanla görüşündə Suriyada terrora qarşı birgə mübarizə və normallaşma üçün Astana formatında işi davam etdirməyi təklif edib.
“Biz Suriya böhranının həllində birlikdə çox mühüm rol oynadıq. Və hesab edirəm ki, Astana formatını davam etdirmək, terrorizmlə mübarizə aparmaq, bizim üçün ən vacib olan bu istiqamətdə vəziyyətin normallaşması üçün bizdən asılı olan hər şeyi etmək düzgün olardı. Ümumiyyətlə, vəziyyət çox müsbət inkişaf edir”, - Putin deyib.
Onun sözlərinə görə, Rusiya Türkiyənin Ukraynadakı böhranın həllinə sadiqliyini minnətdarlıqla qeyd edir:
“Türkiyəli dostlarımızın böhranlı vəziyyətlərin, o cümlədən Ukrayna ətrafındakı böhranın həllinə töhfə vermək əzmini minnətdarlıqla qeyd edirik”.
Rusiya prezidenti həmçinin siyasətçiyə danışıqlar prosesini dəstəklədiyinə və böhranın həlli ilə bağlı Ukrayna ilə danışıqlar üçün İstanbul platformasını təmin etdiyinə görə təşəkkür edib.
V.Putin onu da bildirib ki, Türkiyə prezidenti Rəcəb Tayyib Ərdoğan taxıl müqaviləsinin bağlanmasında mühüm rol oynayıb.
“Prezident Ərdoğanın taxıl müqaviləsinin bağlanmasında da böyük rolu olub. Təəssüf ki, (sazişin) uzadılmaması bizim günahımız deyil”.
Rusiya prezidenti Vladimir Putin iyulda Astanada Türkiyə prezidenti Rəcəb Tayyib Ərdoğanla görüşəcəyini də dilə gətirib.
“Sizdən xahiş edirəm ki, prezident Ərdoğana ən xoş arzularımı çatdırasınız. Ümid edirəm ki, yaxın gələcəkdə, iyulda, mənim fikrimcə, iyulun 3-də və ya 4-də o, beynəlxalq tədbir çərçivəsində Astanada, bildiyimə görə, olmalıdır və bizim onunla görüşmək, bütün cari məsələləri müzakirə edin imkanımız olacaq”, - Putin Türkiyənin xarici işlər naziri Hakan Fidanla görüşdə deyib.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.