BAKI, 30 may — Sputnik. İşğaldan azad edilmiş ərazilərimizin 10 285 kvadrat kilometri mina və partlamamış hərbi sursatlarla müxtəlif səviyyələrdə çirklənmiş hesab olunur.
Bunu Azərbaycan Respublikası Minatəmizləmə Agentliyinin İdarə Heyətinin sədri Vüqar Süleymanov Zəngilanda keçirilən 3-cü beynəlxalq humanitar minatəmizləmə konfransının açılışında bildirib.
Vüqar Süleymanov ANAMA-nın idarə heyətinin sədri
© Sputnik / Emin Alisahib
Onun sözlərinə görə, bir milyondan çox minanın hələ də çıxarılmadığı ehtimalı var.
"Bundan başqa, işğal dövründə çaylar da böyük miqdarda çirkləndirilib. Eyni zamanda, ətraf minalardan başqa digər partlayıcılarla da çirklənib. Ümumi olaraq 44 günlük müharibədən sonra 361 nəfər minaların qurbanı olub, 293 nəfər ağır xəsarət alıb. 1991-ci ildən bəri isə 3000-dən çox vətəndaş minanın qurbanı olub. Minanın olması ərazidə və bölgədə böyük problemə çevrilib. 900-ə yaxın yaşayış yeri dağıdılıb, torpaqlar istifadəsiz qalıb və kənd təsərrüfatına ziyan vurulub. Bu da böyük ekoloji problemə çevrilir. Tərtər, Həkəri, Qarqar çayları da işğal zamanı böyük ekoloji çirklənməyə məruz qalıb" - qurum rəhbəri bildirib.
Qeyd edilib ki, bu günə qədər aparılan minatəmizləmə prosesi nəticəsində 140 min hektara yaxın sahə 119 min 946 mina və partlamamış hərbi sursatlardan təmizlənib.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.