BAKI, 29 may — Sputnik. Azərbaycan-Rusiya münasibətləri tamamilə yeni mərhələyə yüksəlib.
Bu sözləri jurnalistlərə Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov Moskvada keçirilən Azərbaycanın Müstəqillik Gününə həsr olunmuş təntənəli qəbulda deyib.
"Çox çətin, mürəkkəb, qanlı və problemli bir dövrdə biz əlaqələrimizi qoruyub saxlaya, onları inkişaf etdirə bildik. Biz bu gün dünyaya qonşu ölkələr arasında münasibətlərin nümunəvi formatını təqdim etmək iqtidarındayıq. Azərbaycan Rusiya ilə strateji münasibətlərə malikdir" - Səməd Seyidov bildirib.
O qeyd edib ki, Rusiya Prezidenti Vladimir Putinin 2001-ci ildə ölkəmizə səfərindən sonra Azərbaycan-Rusiya münasibətləri tamamilə yeni bir mərhələyə keçib: "Bu gün bütün sahələrdə, o cümlədən parlamentlərarası əlaqələrimiz yüksəlir. Azərbaycan parlamentinin Beynəlxalq əlaqələr komitəsi Rusiya Federasiyasının dəvəti ilə Moskvada çox yüksək səviyyədə görüşlər keçirdi. Rusiya Federal Məclisi Beynəlxalq əlaqələr komitəsinin sədri Qriqori Karasin, Dövlət Dumasının Beynəlxalq əlaqələr komitəsinin sədri Leonid Slutski ilə səmərəli danışıqlarımız oldu".
S.Seyidov, həmçinin Moskva Dövlət Beynəlxalq Əlaqələr İnstitutunun (MDBƏİ) tələbə-müəllim heyəti ilə görüşlərindən də danışıb və orada təhsil alan azərbaycanlı tələbələrlə maraqlı dialoq apardıqlarını vurğulayıb.
Azərbaycan-Rusiya əlaqələrinin bütün sahələrdə genişləndiyini diqqətə çatdıran deputat sonda əlavə edib: "Bizi ayırmaq, fürsətdən istifadə edərək üçüncü ölkə kimi regiona müdaxilə etmək istəyən qüvvələr iflasa uğrayıb. İndi bizim yolumuz regionda sülhü, tərəqqini, qonşuluq əlaqələrini ən yüksək səviyyədə təmin etməkdir".
Xatırladaq ki, Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov və deputat Sabir Hacıyev mayın 26-da Rusiya Federasiyasının paytaxtı Moskva şəhərinə səfər ediblər.
Rusiya Federasiyası Federal Məclisi Federasiya Şurasının Beynəlxalq məsələlər komitəsinin sədri Qriqori Karasinin dəvəti əsasında baş tutan səfər zamanı deputatlarımız bir sıra görüşlər keçirib, parlamentlərarası əməkdaşlığın inkişafı, qanunvericilik sahəsində təcrübə mübadiləsi və digər qarşılıqlı maraq doğuran məsələlərlə bağlı müzakirələr aparıblar.