BAKI, 23 may — Sputnik. Universitetlərdə elmi tədqiqat işləri ilə bağlı ən böyük problem adambaşına maliyyələşmə ilə bağlıdır. Sputnik Azərbaycan xəbər verir ki, bunu elm və təhsil naziri Emin Əmrullayev VI İqtisadiyyat və İdarəetmə Sahəsində Tədqiqatçıların Beynəlxalq Elmi Konfransında (İSCEMR) deyib.
O bildirib ki, Azərbaycan ali təhsil müəssisələri müəyyən mənada gənc hesab oluna bilər:
"Bir müddət onlar əsasən kadr hazırlığı ilə məşğul olub. Təhsil islahatları zamanı bəzi müəssisələrin adının akademiya, institut kimi dəyişməsi də təsadüfi deyil. Elm və Təhsil Nazirliyi olaraq elmi tədqiqatların da stimullaşdırılması bizim üçün əhəmiyyətlidir. Hazırda universitetlərdə elmi tədqiqat sahəsində ən böyük problem adambaşına maliyyələşmə ilə bağlıdır".
Nazir onu da bildirib ki, təhsil, təqaüd maliyyəsi hesabına universitetlərdə elmi tədqiqat işlərini maliyyələşdirmək olduqca çətindir.
"Biz ən yaxşı halda mütəxəssis hazırlaya bilirik, tədqiqatçı yox. Bugünkü göstərici odur ki, Azərbaycanda ali təhsil müəssisələrində elmli tədqiqat komponenti aşağıdır. Müsbət dinamika var və bu bizim üçün çox önəmlidir" - Emin Əmrullayev bildirib.
Emin Əmrullayev deyib ki, Azərbaycanda kredit əsaslı doktorantura proqramlarının maliyyələşdirilməsi mütləqdir. O bildirib ki, bu gün Azərbaycanda doktorantura proqramları köklü şəkildə dəyişməlidir.