BAKI, 13 may — Sputnik. "Eurovision" Mahnı Müsabiqəsinin supervayzeri Martin Osterdal İsveçin Malmö şəhərində builki tədbirdə baş verən bir sıra qalmaqallardan sonra istefaya çağırılıb. Bu barədə "The Sun" nəşri mənbələrə istinadən yazıb.
"Eurovision-un icraçı nəzarətçisi, 50 yaşlı Martin Osterdalın builki tədbiri idarə etməsinə görə istefaya göndərilməsi ilə bağlı çağırışlar edilib" - "The Sun" yazır.
Nəşrin mənbəsinin sözlərinə görə, yarışmanın pərdə arxasında təşkilatçılığa qəzəb var. "İnsanlar düşünür ki, bunu daha yaxşı etmək olardı. "Eurovision" bayram əhval-ruhiyyəsində olmalı idi, amma bu il qarışıq oldu" - mənbə nəşrə bildirib.
Bundan əlavə, qəzet Böyük Britaniyada Eurovision 2024-ə 8,5 milyon televiziya tamaşaçısının baxdığını qeyd edir. Qəzetin yazdığına görə, bu, 2023-cü illə müqayisədə 2,5 milyon televiziya izləyicisi azdır və baxışların sayının azalması digər amillərlə yanaşı, silahlı münaqişə fonunda İsrail nümayəndəsinin iştirakını boykot etməsi ilə bağlıdır.
Daha əvvəl Avropa Yayım Birliyi (EBU) şikayətlərə görə İsveç polisi tərəfindən sorğu-sual edilən niderlandlı iştirakçı Yüst Klaynın mahnı müsabiqəsinin finalında çıxış etməyəcəyini açıqlamışdı. Niderland yayımçısı Avrotros qərarı pisləyib və onu qeyri-obyektiv adlandırıb.
Mayın 11-12-də İsveçin Malmö şəhərində Eurovision Mahnı Müsabiqəsinin finalı baş tutub, onun qalibi İsveçrə təmsilçisi - "The Code" mahnısı ilə Nemo təxəllüsü ilə tanınan müğənni Nemo Mettler olub.
"Eurovision" Avropa Yayım Birliyinin himayəsi altında keçirilən beynəlxalq musiqi yarışmasıdır. Rusiya müsabiqədə iştirak etmir.