Tarixdə bu gün: 1 may – FOTO

Mais Ağabəyov (1941 - 2020) - Azərbaycan Respublikasının xalq rəssamıdır. O, 1969-cu ildə Cəfər Cabbarlı adına "Azərbaycanfilm" kinostudiyasında işləməyə başlayıb. Rəssam "Nəsimi", "Babək", "Çalış, nəfəs alma", "Nizami", "Dağıdılmış körpülər", "Gümüşgöl əfsanəsi" və s. filmlərin quruluşçu rəssamı olub.

Nazim Əhmədli (1953) - Azərbaycan yazıçısı, tərcüməçi və 1986-cı ildən Azərbaycan Yazıçılar Birliyinin üzvüdür. Yazıçısı hazırda Azərbaycan Respublikasının Dövlət Kino-Foto Sənədləri Arxivinin direktor müavini vəzifəsində çalışır.

Fyodor Xitruk (1917 - 2012) - Sovet və Rusiya rejissoru, rəssamı və SSRİ xalq artistidir. O, "Vinni Pux" haqqında üç cizgi filminin müəllifi olmaqla yanaşı, "Bonifatsın sərgüzəştləri", "Emelya haqqında nağıl", "Milçək Tsokotuxa" və s. cizgi filmləri də çəkib.

Viktor Astafyev (1924 – 2001) - Sovet və Rusiya yazıçısı, dramaturqu və ssenaristdir. "Aşırım", "Ulduz axını", "Oğurluq" və s. povestlər onun ən məşhur əsərləridir.

Sergey Zaxarov (1950 – 2019) - Sovet və Rusiya müğənnisi, aktyoru və RF xalq artistidir. O, Rusiya romantik musiqisi proqramı, P.Çaykovskinin, S.Raxmaninovun, M.Qlinkinin və M.Musorqskinin əsərləri ilə çıxış edərək 43 ölkədə qastrol səfərində olub.

Ceymi Dornan (1982) - ingilis aktyor, model və musiqiçidir. O, "Bozun əlli çaları" filmindəki Kristian Qrey rolu ilə tanınıb.

1682-ci ildə XIV Lüdovik Paris Rəsədxanasının təntənəli şəkildə açılışını edib.

1707-ci ildə vahid parlament və mərkəzi hökumətlə Böyük Britaniya Birləşmiş Krallığının tərkibinə daxil olan Şotlandiya və İngiltərə Birliyi Müqaviləsi imzalanıb. XIII əsrdə yaradılan Şotlandiya Parlamenti ləğv edilib, lakin ölkə ingilis qurumuna nümayəndələr seçmək hüququ qazanıb.

1840-cı ildə rəsmi olaraq poçt markaları İngiltərədə satışa çıxıb. Bu markalar Kraliça Viktoriyanın portreti ilə buraxılıb. Bununla əlaqədar olaraq 1 may poçt markasının günü kimi qeyd olunur.

1886-cı ildə amerikalı işçilər tətil edərək səkkiz saatlıq iş günü tələbini irəli sürüblər. Bu tətil və nümayiş daha sonra polis qarşıdurmaları və qan tökülməsi ilə başa çatıb. Üç il sonra II İnternasionalın Paris Konqresi işçilərin bu mitinqinin xatirəsinə hər il mayın 1-də zəhmətkeşlərin nümayişlərini keçirmək qərarına gəlib. Beləliklə, Əmək Günü (Beynəlxalq Zəhmətkeşlər Günü də adlanır) yaranıb.

1945-ci ildə Qırmızı Ordunun hərbçiləri Aleksey Berest, Mixail Yeqorov və Meliton Kantariya tərəfindən Berlində Reyxstaq üzərində Qələbə bayrağı qaldırılıb.