BAKI, 30 aprel — Sputnik. 2023-24-cü maliyyə ilində 2,5 milyard dollar həddini keçən Hindistanın müdafiə ixracı artır. Bunu ölkənin müdafiə naziri Racnath Sinqh Əhmədabad şəhərində hakim Bharatiya Canata Partiyasına dəstək aksiyası zamanı deyib.
"2014-cü ildə biz 6 milyard rupi (72 milyon dollar) dəyərində müdafiə təyinatlı məhsullar ixrac etmişik, indi isə bu rəqəm 210 milyard rupini (2,5 milyard dollar) ötüb və deyə bilərəm ki, artacaq", - o bildirib.
Müdafiə naziri onu da qeyd edib ki, bu gün Hindistan 12 milyard dollarlıq müdafiə istehsalı həcminə nail olub.
Stokholm Beynəlxalq Sülh Araşdırmaları İnstitutunun son hesabatına görə, Hindistan 2023-cü ildə hərbi xərclərə görə dünyada dördüncü yerdə qərarlaşıb, Nyu-Dehli isə silahlara 83,6 milyard dollar xərcləyib.
Qeyd edək ki, Ermənistan son illər Hindistanın aparıcı hərbi-texniki tərəfdaşlarından birinə çevrilib. Ermənistan və Hindistan yüz milyonlarla dollar dəyərində silah və hərbi texnikanın tədarükü üçün müqavilələr bağlayıb.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.