BAKI, 15 aprel — Sputnik. Əbu-Dabi Milli Neft Şirkəti (ADNOC) Britaniyanın BP-sini almağı düşünürdü, lakin danışıqlar uzağa getmədi və BƏƏ-nin dövlət şirkəti sonda satınalmanın əleyhinə qərar verdi.
Belə ki, “Reuters”in məlumatına görə, ADNOC şirkəti BP ilə ilkin danışıqlar aparıb və Britaniya şirkətinin mümkün alışı ilə bağlı məsləhət almaq üçün investisiya bankları ilə əlaqə saxlayıb.
“Reuters”in mənbələrinə görə, ADNOC nəticədə BP-nin öz strategiyasına uyğun olmadığına qərar verib. Mənbələrdən birinin dediyinə görə, siyasi mülahizələr də potensial addıma təsir göstərib.
İnvestorların və analitiklərin fikrincə, 110,3 milyard dollar gəliri olan BP, mənfəət baxımından neft və qaz nəhəngi rəqiblərini illərdir geridə qoyaraq, Britaniya firmasını potensial satınalma hədəfinə çevirib.
Qeyd edək ki, ötən il 13,8 milyard dollar mənfəət əldə etdiyini bildirən BP, bazar kapitallaşmasının gəlirə nisbətinə görə dünya neft şirkətləri arasında ən aşağı əmsalla qiymətləndirilir.
Bununla yanaşı, analitiklər hesab edirlər ki, BP-nin səhmləri “analoqlarla müqayisədə açıq endirimlə” satılsa da, şirkət “öz kəşfiyyat və hasilat portfelində yaxşı böyümə imkanları və öz sinfində ən yaxşı ticarət biznesi də daxil olmaqla cəlbedici aktivlər toplusuna” malikdir.
Qeyd etmək yerinə düşər ki, BP və ADNOC uzunmüddətli əməkdaşlıq tarixinə malikdirlər - fevralda onlar Misirdə qaz aktivlərinin inkişafı üçün birgə müəssisənin yaradılmasını elan ediblər. Keçən il onlar, həmçinin İsrailin qaz istehsalçısı “NewMed”in 50%-ni 2 milyard dollara almaq təklifi ilə çıxış ediblər, lakin saziş regiondakı münaqişə üzündən dayandırılıb.
Xatırladaq ki, ötən ilin oktyabrında məlum olmuşdu ki, Azərbaycan Dövlət Neft Şirkəti (SOCAR) İsrailin ən böyük karbohidrogen yatağı olan “Leviafan”ın şimal hissəsində qaz kəşfiyyatı üçün lisenziya alıb. Şirkət Böyük Britaniyanın BP və İsrailin “NewMed” şirkətlərindən ibarət şirkətlər qrupunun tərkibində işlər görəcək.
BP - Azərbaycan layihələrinin operatoru
Qeyd edək ki, BP Azərbaycanda neft və qaz yataqlarının kəşfiyyatı və işlənməsi ilə məşğul olan ən böyük xarici şirkətdir. Britaniya şirkəti “Azəri-Çıraq-Günəşli” və “Şahdəniz” neft-qaz layihələrinin operatorudur.
BP həm də “Şəfəq-Asiman” yatağının işlənməsi üzrə müqavilədə operatordur və 50% paya malikdir, qalan 50% pay isə SOCAR-a məxsusdur.
Bundan əlavə, BP şirkəti Bakı-Tbilisi-Ceyhan boru kəmərinin Azərbaycan və Gürcüstanda yerləşən hissələrinin operatorudur. Britaniya şirkəti həm də Cənubi Qafqaz Qaz Boru Kəmərinin (CQBK) texniki operatoru olub və 2021-ci ildən BP bu funksiyanı SOCAR-a verib.
Eyni zamanda, BP Xəzər hövzəsində BP-nin istismar etdiyi bütün mövcud dəniz yataqlarından hasil edilən xam neft və qazı qəbul etmək, emal etmək, saxlamaq və ixrac etmək üçün nəzərdə tutulmuş Səngəçal terminalının operatorudur.
Xatırladaq ki, ötən il ADNOC-un Azərbaycanın “Abşeron” qaz-kondensat yatağında 30% pay alacağı məlum olub. ADNOC Azərbaycan Dövlət Neft Şirkəti (ARDNŞ) və TotalEnergies-dən hər biri 15% pay alacaq və əməliyyat başa çatdıqdan sonra hər biri yataqda 35% paya sahib olacaq.
Əmirlik şirkətinin bu qərarı xarici ölkələrdə fəaliyyətini genişləndirmək planları ilə bağlıdır və qeyd etmək lazımdır ki, “Abşeron” ADNOC-un karbohidrogen yataqlarının işlənməsi və hasilatı üzrə ilk xarici layihəsidir.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.