BAKI, 13 aprel — Sputnik. Çin, İndoneziya və Səudiyyə Ərəbistanı Avropa İttifaqından Rusiyanın dondurulmuş aktivlərinin müsadirəsindən imtina etməyi istəyir. Bu barədə "Politico" nəşri mənbələrə istinadən məlumat yayıb.
Məlumata görə, bu üç dövlət Rusiyanın təqribən 200 milyon avroluq aktivlərinin müsadirə edilməsində israr edən "ABŞ və Böyük Britaniyanın təzyiqlərinə boyun əyməmək" tələbi ilə Aİ nümayəndələrinə fərdi şəkildə müraciət ediblər.
"Bu ölkələr belə bir fikrə çox şübhə ilə yanaşırlar", – adının açıqlanmasını istəməyən mənbə bildirib.
Onun sözlərinə görə, Çin, İndoneziya və Səudiyyə Ərəbistanı belə bir addımın gələcəkdə digər ölkələrin aktivlərinin müsadirə edilməsi üçün nümunə yaradacağından narahatdır.
Aİ üzvü olmayan bir ölkədən olan yüksək səviyyəli diplomatlardan biri deyib ki, Rusiya öz dostlarından bunu xahiş edib.
"Politico" qeyd edir ki, Çin, İndoneziya və Səudiyyə Ərəbistanının aktivlərin müsadirə edilməsinin qarşısını almaq üçün göstərdiyi səylər Ukraynadakı münaqişənin uzanacağı və onların öz iradəsinə zidd olaraq tərəf tutmağa" məcbur olacağı qorxusu ilə bağlı ola bilər. Bundan əlavə, onlar Rusiya Federasiyasının cavab olaraq dost ölkələrdən Qərbin aktivlərini müsadirə etməyi xahiş etməsi və bunun onların reputasiyasına xələl gətirəcəyi ehtimalından narahat ola bilərlər.
Nəşr xatırladıb ki, indiyədək Rusiyanın Aİ-dəki aktivlərinin gələcəyi ilə bağlı heç bir qərar verilməyib və onların tam müsadirə edilməsi ideyası "arxa plana" keçib. "Politico" yazır ki, bununla belə, ABŞ və Böyük Britaniya, xüsusən də Rusiyaya qarşı düşmən münasibəti dayanmır.
Eyni zamanda, Çin, İndoneziya və Səudiyyə Ərəbistanının narahatlıqları "bəzi Avropa paytaxtlarında da səslənir", çünki Rusiya müsadirəyə etiraz edib iddianı qazana bilər ki, bu da qara dəlik yaradacaq.
Böyük Britaniyanın xarici işlər nazirinin müavini Nüsrət Qani Yeddilik Qrupu (G7) ölkələrinin iyunda keçirilməsi planlaşdırılan sammit ərəfəsində dondurulmuş Rusiya aktivlərinin Ukraynaya köçürülməsi yollarına dair yeni təkliflər təqdim edəcəyini bildirmişdi.
Avropa Komissiyası bundan əvvəl bloklanmış Rusiya fondlarından əldə olunan gəlirlərin Kiyevə yardım göstərmək üçün istifadə edilməsi təklifini təsdiqləyib. Aİ-nin Xarici İşlər və Təhlükəsizlik Siyasəti üzrə Ali Nümayəndəsi Josep Borrell deyib ki, bu təşəbbüs Rusiya Federasiyasının Ukrayna üçün mərmilərin alınması üçün gəlirlərinin 90%-nin köçürülməsini və 10%-nin Aİ büdcəsinə sonrakı dəstək üçün transferini nəzərdə tutur. İlk ayırmalar iyulun əvvəlində edilə bilər.
Rusiya Federasiyası Mərkəzi Bankının rəhbəri Elvira Nabiullina bildirib ki, Rusiya Bankı Qərb Rusiyanın dondurulmuş aktivlərindən istifadə edərsə, öz maraqlarını qorumaq üçün müvafiq tədbirlər görəcək.