Texniki şərtlərin verilməsi ilə bağlı tələb olunan sənədlərin sayı azalacaq

BAKI, 29 mart — Sputnik. Milli Məclisdə "Su təchizatı və tullantı suları haqqında" qanuna dəyişiklik müzakirə edilib.

Parlamentin Təbii ehtiyatlar, energetika və ekologiya komitəsinin sədri Sadiq Qurbanov bildirib ki, qanuna dəyişiklik Dünya Bankı Qrupunun "Əlverişli biznes mühiti" layihəsinin "Kommunal xidmətlərə qoşulma" indikatoru ilə bağlı müvafiq sahədə təkmilləşmələrin həyata keçirilməsinə dair Yol Xəritəsi"nə uyğun olaraq hazırlanıb. Bu layihə habelə tikinti obyektlərinin su təchizatı və tullantı sularının axıdılması sisteminə qoşulması qaydasının, eyni zamanda qoşulma xəttinə görə ödəniş məbləğinin təsdiq edilməsi və Nazirlər Kabinetinin "Su təchizatı və tullantı sularının axıdılması sisteminə qoşulması üçün texniki şərtlərin verilməsi və qoşulması qaydalarının təsdiq edilməsi haqqında" 2014-cü il qərarının ləğv edilməsi məqsədi ilə hazırlanıb.

Komitə sədri bildirib ki, layihədə tikinti obyektlərinin su təchizatı və tullantı sularının axıdılması sisteminə qoşulması qaydalarında müvafiq anlayışlardan istifadə edilməsi zərurəti ilə bağlı qanunun 1-ci maddəsinə qoşulma nöqtəsi, fiziki qoşulma, qoşulma müqaviləsi, qoşulma xidmətinə görə ödəniş, texniki şərtlər, məişət abonenti anlayışlarının əlavə edilməsi təklif olunur.

S.Qurbanov qeyd edib ki, qanun layihəsinə əsasən, tikinti obyektlərinin su təchizatı sisteminə qoşulmasının hüquqi əsasları bu sahədə qabaqcıl beynəlxalq təcrübəyə uyğun olaraq təkmilləşdiriləcək:

"Təklif olunan qoşulma qaydaları istehlakçıların hüquqlarının qorunması və keyfiyyətli su təchizatı xidmətinin göstərilməsi üçün sistemin fəaliyyətinin dayanıqlığının artırılmasını özündə ehtiva edir. Bununla yanaşı, sənəddə sahibkarlıq subyektlərinin su təchizatı və kanalizasiya sisteminə qoşulmasının daha da optimallaşdırılması, vətəndaşlar və digər istehlakçılarla xidmət qurumlarının münasibətlərində şəffaflığın artırılması, qoşulma tələbləri ilə bağlı şəffaflığın təmin edilməsi nəzərdə tutulur. Qanun qəbul edildikdən sonra su təchizatı və kanalizasiya sisteminə qoşulmanın qayda və şərtlərini müəyyən edən müvafiq qaydalar da yenilənəcək".

"Qanuna dəyişiklik bu sahədə aparılan islahatlara dəstəkdir. İndiyədək tikinti obyektlərinin su təchizatına qoşulması ilə bağlı problemlər var, 13-15 sənəd tələb olunur. Dəyişiklik qəbul edildikdən sonra artıq 3 sənəd tələb ediləcək. Hazırda tikinti obyektlərinin elektrik enerjisinə qoşulması üçün "ASAN kommunal" mərkəzlərinə müraciət edilir. Su təchizatına qoşulma sistemini də təkmilləşdirəcəyik" - komitə sədri əlavə edib.

Qeyd edək ki, tikinti obyektlərinin su təchizatı sisteminə qoşulması qoşulma müqaviləsi əsasında həyata keçiriləcək və sifarişçiyə qoşulma müqaviləsinin tərkib hissəsi olan texniki şərt veriləcək. Tikinti obyektlərinin su təchizatı sisteminə qoşulmasına görə sifarişçi su təchizatı müəssisəsinə qoşulma xidmətinə görə ödəniş edəcək.

Dəyişikliyə əsasən, məişət abonentlərinin və sutka ərzində tələb olunan buraxılış həcmi 100 kubmetrə qədər olan tikinti obyektinin su təchizatı sisteminə qoşulması üçün sifarişçi tərəfindən qoşulma xidmətinə görə ödəniş edildikdən sonra texniki şərtlərin, layihə sənədlərinin hazırlanması və tikinti quraşdırma işləri su təchizatı müəssisələri tərəfindən həyata keçiriləcək.

Sutka ərzində tələb olunan buraxılış həcmi 100 kubmetrdən yuxarı olan tikinti obyektlərinin su təchizatı sisteminə qoşulması üçün sifarişçi tərəfindən qoşulma xidmətinə görə ödəniş ediləcək. Və su təchizatı sistemlərinin layihəsinin hazırlanması və tikinti obyektlərindən su təchizatı sistemlərinə qoşulma nöqtəsinədək tikinti-quraşdırma işləri sifarişçinin seçdiyi podratçı, yaxud su təchizatı müəssisələri tərəfindən sifarişçinin hesabına həyata keçiriləcək.

Layihəyə əsasən, məişət abonenti – yaşayış evlərində, mənzillərdə, o cümlədən xüsusi təyinatlı yaşayış sahələrində, həmçinin bağlarda məişət ehtiyacları üçün su təchizatı və tullantı sularının axıdılması xidmətlərindən istifadə edən fiziki şəxsdir.

Texniki şərtlər – tikinti obyektlərinin su təchizatı və tullantı sularının axıdılması sistemlərinə qoşulması məqsədilə layihə sənədlərinin hazırlanmasına əsas verən, su təchizatının və kanalizasiya xidmətlərinin təmin edilməsi ilə bağlı mühəndis-texniki parametrləri özündə əks etdirən texniki sənəddir.

Xatırladaq ki, deputat Vüqar Bayramov bildirib ki, bu gün kommunal xidmətlərdən istifadə etməkdə ən ciddi məsələlərdən biri məhz texniki şərtlərin verilməsidir:

"Bu qanun layihəsi texniki şərtlərin verilməsi ilə bağlı proseduru asanlaşdıracaq, tələb olunan sənədlərin sayında azalma olacaq. Texniki şərtlərin verilməsi prosedurunun asanlaşdırılması vacibdir. Burada elektron xidmətlərdən istifadə olunsa belə, bir sıra hallarda həm vətəndaşlar, həm də biznes subyektləri tərəfindən texniki şərtlərin alınmasında çətinliklər var. Bu çətinliklərin aradan qaldırılması olduqca vacibdir".

O qeyd edib ki, qoşulma xərcləri hələ də yüksək olaraq qalmaqdadır:

"Bu, biznes üçün əlavə xərclər yaradır. Kommunal xidmətləri təklif edən qurumlar, qiymətləri daha aşağı təklif etməlidir. Digər məsələ qoşulma müddətilə bağlıdır. Su təchizatına qoşulmaq üçün tələb olunan müddət 30 gündür. Bu, kifayət qədər uzun müddətdir. Xüsusən də ötürmə qabiliyyəti yüksək olmayan xətlərə qoşulma müddəti azaldılmalıdır".

"Su təchizatı və tullantı suları haqqında" qanuna dəyişiklik sonuncu oxunuşda səsə qoyularaq qəbul edilib.