BAKI, 23 mart - Sputnik. Rusiya Federasiyası Müsəlmanları Ruhani İdarəsinin (RF DUM) sədri, müfti Ravil Qaynutdinin tapşırığı ilə Krasnoqorsk Müsəlman Mərkəzində mənəvi-psixoloji dəstək mərkəzi yaradılıb və fəaliyyət göstərir. Bu barədə RİA Novosti-yə Moskva vilayətinin müftisi Ruşan Abbyasov bildirib.
“Rusiya Müsəlmanları Ruhani İdarəsinin rəhbəri, müfti Ravil Qaynutdin Krasnoqorskdakı müsəlman mərkəzində mənəvi və psixoloji yardım göstərən məntəqənin təcili təşkil edilməsi barədə göstəriş verib. Orada yerli müsəlman icmasının imamları növbə çəkir”, - müfti Ruşan Abbyasov bildirib.
Moskva vilayətinin müftisi Crocus City Hall-da törədilən terror aktını pisləyib.
“Bütün müsəlmanlar həlak olanların yaxınlarına başsağlığı verir, yaralananların tezliklə sağalmasını dua ilə arzulayır”, - deyə Abbyasov bildirib.
Rusiya İstintaq Komitəsinin son məlumatlarına görə, ən azı 60 nəfər ölüb, lakin idarə bu rəqəmin hələ də arta biləcəyini qeyd edib.
Səhiyyə naziri Mixail Muraşko 115 nəfərin xəstəxanaya yerləşdirildiyini, onlardan beşinin uşaq, 60 böyük və bir uşağın vəziyyətinin ağır olduğunu bildirib. Terror aktı ilə bağlı cinayət işi açılıb.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.