BAKI, 28 fevral — Sputnik. Ermənistan Baş naziri Nikol Paşinyanın İrəvanın təşkilatın işində iştirakının dondurulması ilə bağlı bəyanatlarına baxmayaraq, Rusiya Ermənistanı KTMT-nin tamhüquqlu üzvü hesab edir. Bunu Rusiya Xarici İşlər Nazirliyinin sözçüsü Mariya Zaxarova deyib.
Paşinyan bir müddət əvvəl Ermənistanla bağlı Kollektiv Təhlükəsizlik Müqaviləsinin yerinə yetirilmədiyini, İrəvanın təşkilatda iştirakını dondurduğunu bildirib.
"Biz 2021-2022-ci illərdə regionda baş vermiş məlum hadisələr zamanı KTMT-nin İrəvan qarşısında mandat və öhdəliklərini yerinə yetirməməsi ilə bağlı Ermənistan hakimiyyətinin iddiaları qətiyyətlə rədd edirik. Xatırladaq ki, 2022-ci ilin sentyabrında Ermənistan tərəfinin müraciəti əsasında təşkilatın katibliyinin və birgə qərargahının qiymətləndirmə missiyası operativ şəkildə formalaşdırılaraq Ermənistanda monitorinq missiyasının yerləşdirilməsi üçün sərhədyanı rayonlara göndərilmək üçün hazırlanıb. Bu qərarın Ermənistan hakimiyyəti tərəfindən uydurma bəhanə ilə rədd edilməsi bizim və digər KTMT üzvlərinin də günahı deyil. Eyni zamanda, təəssüflə qeyd edirik ki, İrəvanın təşkilatın tədbirlərində iştirak dinamikası azalıb" - Zaxarova bildirib.
KTMT-yə altı dövlət daxildir: Ermənistan, Belarus, Qazaxıstan, Qırğızıstan, Rusiya və Tacikistan. Rusiyanın müdafiə naziri Sergey Şoyqu mayın sonunda erməni tərəfinin KTMT çərçivəsində birgə əməliyyat və döyüş hazırlığı fəaliyyətlərində iştirakının vacibliyini qeyd edib. Rusiya prezidentinin mətbuat katibi Dmitri Peskov Ermənistanın Kollektiv Təhlükəsizlik Müqaviləsi Təşkilatında iştirakının perspektivlərindən danışarkən bildirib ki, Rusiya Federasiyası erməni dostları, o cümlədən KTMT ilə bağlı dialoqu davam etdirəcək.