BAKI, 22 fevral — Sputnik. Rusiya Təhlükəsizlik Şurasının sədr müavini Dmitri Medvedev 2024-cü ildən nə gözlədiyini bildirib. Onun sözlərinə görə, əksər rusiyalılar kimi o da Rusiya Federasiyasının xüsusi hərbi əməliyyatda (XHƏ) qalib gəlməsini gözləyir.
Bu barədə diplomat Rusiya mətbuatına müsahibəsində qeyd edib.
"Bu il, əslində, tam sürətlə gedir, artıq fevral ayının ortasıdır. Beləliklə, müəyyən tendensiyaların formalaşdığı tamamilə aydındır. Mən nəyi gözləyirəm? Düşünürəm ki, vətəndaşlarımızın əksəriyyəti kimi mən də xüsusi hərbi əməliyyatda qələbə gözləyirəm" - siyasətçi etiraf edib.
Rusiya Təhlükəsizlik Şurasının sədr müavini həmçinin XHƏ-də iştirak edən bütün müdafiəçilərin vətənlərinə qayıtmasını gözləyir.
Medvedev Rusiyanın bu il qalib gələ biləcəyini göstərən yaxşı tendensiyaları da qeyd edib. O əlavə edib ki, Rusiya bütün çətinliklərə baxmayaraq işləyir və inkişaf edir.
"Ümid edirəm ki, bütün bunlar ilin qalan aylarında da davam edəcək" - Medvedev fikrini yekunlaşdırıb.
Bu yaxınlarda Dmitri Medvedev bildirib ki, Rusiya üçün xüsusi hərbi əməliyyatda qələbə Böyük Vətən Müharibəsi dövründə olduğu kimi ümummilli olacaq. Onun sözlərinə görə, uzun əsrlər boyu heç kim Rusiyanı öz iradəsinə tabe edə bilməyib, buna görə də indi də heç nə alınmayacaq.
Rusiya Prezidenti Vladimir Putin birbaşa xətt zamanı Rusiyanın xüsusi hərbi əməliyyatda qələbəsinə əmin olduğunu bəyan edib.