BAKI, 5 fevral — Sputnik. İranın xarici işlər naziri Hüseyn Əmir Abdullahiyan Yaxın Şərq dövlətləri ərazisində hərbi əməliyyatlar aparan ABŞ və Böyük Britaniyanı regionun qəzəbinə tuş gəlməməyə çağırıb. Bu barədə TASS məlumat yayıb.
"ABŞ və Böyük Britaniyanın Yəmənə hərbi hücumlarını, eləcə də ABŞ-ın İraq və Suriyaya təcavüzünü qətiyyətlə pisləyirik. İran İraq, Suriya, Yəmən və Fələstinin (Qəzza zolağı və İordan çayının qərb sahili – TASS qeydi) təhlükəsizliyini bütün regionun təhlükəsizliyi kimi nəzərdən keçirir" - nazir bildirib.
Fevralın 4-də İslam Respublikası Xarici İşlər Nazirliyinin rəsmi nümayəndəsi Nasir Kənani Şafi bildirib ki, ABŞ və Böyük Britaniya Yəmənin "Ənsar Allah" hərəkatının (husilərin) mövqelərinə hücumları davam etdirərək, bütün regionda təhlükəsizliyi təhdid edir. Kənani Şafi ABŞ-ın İraq və Suriyaya zərbələrini strateji səhv adlandırıb.
Qəzza zolağında qarşıdurmanın şiddətlənməsindən sonra "Ənsar Allah" hərəkatı İsrail ərazisinə hücumlar həyata keçirəcəyini və gəmilərin Qırmızı dəniz və Bab əl-Məndəb boğazından keçməsinə icazə verməyəcəyini bildirib. Ötən il noyabrın ortalarından bəri husilər Qırmızı dəniz və Ədən körfəzində onlarla mülki gəmiyə hücum ediblər. İraq və Suriyadakı şiə silahlı qrupları isə öz növbəsində ABŞ-ın dəstəklədiyi İsrailin Fələstin əhalisinə qarşı törətdiyi qırğınlara cavab olaraq bu ölkələrdəki ABŞ hərbi bazalarına hücumlar həyata keçirməyə başlayıb.
Fevralın 4-də ABŞ Mərkəzi Komandanlığı (CENTCOM) "Ənsar Allah" hərəkatının husi üsyançılarının beş qanadlı raketini hədəfə alaraq Yəmənə növbəti zərbələr endirib. Fevralın 3-də ABŞ və Britaniya qüvvələri husilərə bağlı 36 hədəfə zərbələr endirib.
CENTCOM-un məlumatına görə, fevralın 3-nə keçən gecə ABŞ aviasiyası İran İslam İnqilabı Keşikçiləri Korpusuna (İran Silahlı Qüvvələrinin elit bölmələri) məxsus Əl-Qüds xüsusi təyinatlılarının mövqelərinə silsilə hücumlar nəticəsində 85-dən çox hədəfi vurub. Bu zərbələr Suriya-İordaniya sərhədindəki Tanf bölgəsində 3 amerikalı hərbçinin həlak olması və 40-nın yaralanması ilə nəticələnən Qərb koalisiyasının hərbi bazasına hücuma cavab olaraq həyata keçirilib. ABŞ və NATO bu hücuma görə Tehranın dəstəklədiyini iddia etdikləri silahlı şiə qruplarını günahlandırıb.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.