Baş plana əsasən, Azərbaycanın paytaxtının nəqliyyat infrastrukturunun gələcəkdə necə dəyişiləcəyini aşağıdakı videomuzda izləyə bilərsiniz.
Azərbaycanda ictimai nəqliyyat sahəsi xeyli geridədir və Bakının Baş Planında nəzərədə tutulan yeniliklər mövcud vəziyyəti yaxşılaşdıracaq. Bunu nəqliyyat sahəsi üzrə ekspert Rauf Ağamirzəyev Sputnik Azərbaycan-a müsahibəsində deyib.
Baş Planın maliyyələşdirilməsinə də toxunan ekspert bildirib ki, bu layihənin maliyyələşməsinin əsas hissəsi dövlətin hesabına həyata keçiriləcək. Onun sözlərinə görə, Bakının baş planının icrası 93,6 mlrd. manata başa gələcək. Bu vəsaitin 60,5 milyard manatı dövlət, 33,1 milyard manatı isə özəl investisiyalar hesabına qarşılanacaq" - Ağamirzəyev qeyd edib.
Ekspertin fikrincə, bu paytaxın nəqliyyat infrastrukturunun yaxşılaşmasına səbəb olacaq.
Rauf Ağamirzəyev hesab edir ki, Baş Planda nəzərdə tutulmuş yeniliklər icra edilərsə, bu paytaxt sakinlərinin yaşayışına, səfərlərini rahat həyata keçirməsinə imkan yaradacaq.
Mütəxəssis onu da bildirib ki, baş planda yer alan əsas amillərdən biri də paytaxtın ekoloji vəziyyətinin yaxşılaşdırılmasına yönəlmiş tədbirlərdir.
"Qeyd edim ki, Baş Planda paytaxtın ekoloji vəziyyətinin yaxşılaşdırılması üçün hibrid dəhlizlərin yaradılması da nəzərdə tutulur. Hibrid yaşıl dəhlizlərlə gəzinti məsafəsində yerləşən ictimai yaşıllıqların sayı artacaq və yaşıllıqların az olduğu ərazilərdə yaşıl məkanların sahəsi daha da genişləndiriləcək" - ekspert fikrini yekunlaşdırıb.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.