BAKI, 18 yanvar — Sputnik. Dünya iqtisadi artımın ləngiməsi baxımından son 30 ilin ən pis beş illik dövrü ilə üzləşib.
Bunu BMT-nin baş katibi Antonio Quterreş Davosda keçirilən Dünya İqtisadi Forumunda bildirib.
O xatırladıb ki, beynəlxalq qeyri-bərabərliklə mübarizə təşkilatı olan "Oxfam"ın məlumatına görə, dünyanın ən zəngin beş adamı 2020-ci ildən bəri sərvətlərini iki dəfədən çox - saatda 14 milyon ABŞ dolları artırıblar, eyni zamanda dünyanın yarısından çoxu isə (təxminən beş milyard insan) ) yoxsullaşıblar.
"Dünya Bankı xəbərdarlıq edir ki, biz son 30 ildə iqtisadi artımın ən pis yarısına doğru gedirik. İqlim xaosundan əziyyət çəkən ölkələrin bir çoxu maliyyə sıxıntıları içərisindədir. Dünyanın 75 ən yoxsul ölkəsinin yarısından çoxu borc böhranı ilə üz-üzədir. Son illərdə onların faiz ödənişləri dörd dəfə artıb" - Quterreş bildirib.
"Onilliklər ərzində yoxsulluğun və aclığın azaldılmasından sonra irəliləyiş ləngiyib, bəzi ölkələrdə isə tərsinə çevrilib. Bu, narazılıq və qəzəbi gücləndirir" - o əlavə edib.
Quterreş "bir çox ölkə və şirkətlərin ümumi gələcək və firavanlığın qayğısına qalmadan öz "dar maraqlarını" güddüklərindən" qəzəbləndiyini bildirib.
"Əminəm ki, tədbir görməsək, bizi daha pis şeylər gözləyə bilər" - BMT-nin baş katibi fikrini yekunlaşdırıb.