BAKI, 3 yanvar - Sputnik. Qazaxıstan prezidenti Kasım-Jomart Tokayev konstitusiya referendumunun keçirilməsi və yenidən 2026-cı ildə keçiriləcək prezident seçkilərində iştirak planları ilə bağlı şayiələri təkzib edib. Bu barədə Tokayevin "Egemen Qazaqstan" qəzetində dərc olunan müsahibəsində deyilir.
"Bu, dezinformasiyadır. Əminəm ki, konstitusiyaya, xüsusən də belə bir fundamental məsələ ilə bağlı özbaşına düzəlişlər etmək artıq mümkün deyil. Konstitusiya islahatı əsas qanuna özbaşına dəyişikliklər etmək məqsədilə aparılmayıb", - dövlət başçısı bildirib.
Onun sözlərinə görə, konstitusiyada prezidentlik müddəti ilə bağlı müddəa dəyişməz qalıb. “Bu norma dövlətimizin müstəqilliyi, unitarlığı, ərazi bütövlüyü və idarəetmə forması ilə bağlı normalar qədər sarsılmazdır”.
Tokayev bildirib ki, o, 15 il əvvəl qapalı müzakirələrdə vahid yeddi illik prezidentlik müddəti ideyasını ifadə edib.
"Sonra bu təklif dəstəklənmədi. Prezident seçiləndən sonra müsbət və mənfi cəhətləri ölçüb-biçdim və bu ideyanın necə həyata keçirilə biləcəyi barədə çox düşündüm. 2022-ci ildə super-prezident səlahiyyətlərinin ləğvinə yönəlmiş bir sıra mühüm konstitusiya dəyişiklikləri həyata keçirildi. Və sonra mən vahid yeddiillik müddət ideyasını irəli sürdüm. Bu təşəbbüs xalqın dəstəyini qazandı. Bu, hər şeyi ifadə edir”, - dövlət başçısı vurğulayıb.
2022-ci il iyunun 5-də Qazaxıstanda konstitusiyaya dəyişikliklərlə bağlı referendum keçirilib və bunu vətəndaşların 77%-dən çoxu dəstəkləyib. Dəyişikliklərə uyğun olaraq, dövlət başçısının səlahiyyətləri azaldılıb, parlamentin və yerli nümayəndəlik orqanlarının rolu əhəmiyyətli dərəcədə gücləndirilib, insan hüquqları sahəsi sistemli şəkildə gücləndirilib, Konstitusiya Məhkəməsi yenidən yaradılıb, ölüm hökmü nəhayət ki, ləğv edilib və ilk prezident Nursultan Nazarbayevin statusu saxlanılıb.
2019-cu ildə Nazarbayev istefa verdiyini elan edərək, respublikada transformasiyaları davam etdirəcək yeni nəsil liderlərin hakimiyyətə gəlməsinin zəruriliyini bildirib. Daha sonra konstitusiyaya uyğun olaraq, dövlət başçısının səlahiyyətləri parlamentin yuxarı palatasının sədri kimi Tokayevə verilib. Həmin ilin iyununda Tokayev prezident seçkilərində qalib gəlib. 2022-ci ilin noyabrında keçirilən növbədənkənar seçkilərdə o, yeddi illik müddətə yenidən Qazaxıstan prezidenti seçilib.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.