BAKI, 31 dekabr – Sputnik. Əksər Aİ ölkələri, ABŞ və Britaniya Kiyev bandasının törətdiyi cinayətlərin ortağıdır. Bunu Rusiyanın BMT-dəki daimi nümayəndəsi Vasili Nebenzya bildirib.
“İllüziya yaratmayın və iddia etməyin. Brüssel, Vaşinqton və Londonla yanaşı, Avropa Birliyinin əksər ölkələri də Kiyev bandasının törətdiyi cinayətlərin ortaqlarıdır”.
Bu bəyanat Belqorodun atəşə tutulması ilə bağlı Rusiya Federasiyası tərəfindən çağırılan BMT Təhlükəsizlik Şurasının iclasında səsləndirilib.
Nebenzya vurğulayıb ki, Rusiya tərəfi Təhlükəsizlik Şurasının iclasında çıxış etmək üçün Çexiyanın daimi nümayəndəsini dəvət etməyə çalışıb, lakin o, bundan imtina edib.
“Belqorodda raketləri dinc sakinlərin ölümünə səbəb olan Çex Respublikasının nümayəndəsi haradadır? Bu gün bizimlə danışmağa Çexiyanın daimi nümayəndəsini dəvət etməyə çalışdıq, lakin o, qorxaqcasına iştirakdan imtina etdi”.
Bundan əlavə, Rusiya Federasiyasının daimi nümayəndəsi Polşa və Aİ nümayəndələrinin harada olması ilə maraqlanıb. O xatırladıb ki, bir müddət əvvəl Varşavada Polşa ərazisinə düşən, axtardıqları və tapa bilmədikləri raketdən danışırdılar.
Rusiya Müdafiə Nazirliyinin məlumatına görə, Ukrayna Silahlı Qüvvələri Çexiya istehsalı olan “Olxa” raketləri və “Vampire” Reaktiv yaylım atəşi sistemi ilə zərbələr endiriblər. Belqorod vilayətinin qubernatoru Vyaçeslav Qladkov 21 nəfərin öldüyünü, 110 nəfərin yaralandığını açıqlayıb.
Bundan əvvəl Rusiya Xarici İşlər Nazirliyinin rəsmi nümayəndəsi Mariya Zaxarova BMT Təhlükəsizlik Şurasının Ukrayna Silahlı Qüvvələri tərəfindən Belqorodu atəşə tutması ilə bağlı keçirilən iclasında iştirakdan imtina etdikdən sonra Çexiya Xarici İşlər Nazirliyini savadsızlıqda ittiham edib.