BAKI, 29 noyabr — Sputnik. Azərbaycanda hərbçilərin ərzaq pulu 210-220 manat civarında artırılacaq.
Bunu Müdafiə Nazirliyinin Hüquq İdarəsinin rəisi Elçin Əliyev Milli Məclisin Əmək və sosial siyasət komitəsinin bugünkü iclasında "Hərbi qulluqçuların statusu haqqında", "Hərbi xidmətkeçmə haqqında" Əsasnamə"nin təsdiq edilməsi barədə", "Əmək pensiyaları haqqında" və "Hərbi vəzifə və hərbi xidmət haqqında" qanunlara dəyişiklik layihəsinin birinci oxunuşda müzakirəsi zamanı deyib.
Onun sözlərinə görə, hazırda Maliyyə Nazirliyi bu məsələnin üzərində işləyir: "Biz də istəyirik ki, verilən pul tezliklə artsın. Bu məsələ mütləq həll olunacaq".
Qeyd edək ki, müzakirələr zamanı deputatlar hərbçilərin ərzaq pulunun artırılması təklifi ilə çıxış ediblər.