BAKI, 17 noyabr — Sputnik. Azərbaycanda diplomatik nümayəndəliyin binasında terror aktı törətməyə cəhd edən şəxs tərksilah edilib.
Uzun müddət gizli müşahidələr aparmış M.H.Hüseyinzadə bu ilin noyabrında xarici dövlətin Azərbaycandakı diplomatik nümayəndəliyinin Bakıdakı inzibati binasına silahlanmış vəziyyətdə terror aktı törətmək üçün soxulmağa cəhd edərkən DTX əməkdaşları tərəfindən cinayət başında saxlanılaraq tərksilah edilib.
Sözügedən şəxs Cinayət Məcəlləsinin 28, 214.2.3 və 28, 214.2.6-cı maddələri ilə təqsirləndirilir.
Bakı şəhəri Səbail Rayon Məhkəməsində Dövlət Təhlükəsizliyi Xidməti müstəntiqinin M.H.Hüseyinzadə barəsində verilmiş vəsatətinə baxılıb.
Məhkəmənin qərarı ilə M.H.Hüseyinzadə barəsində 4 ay müddətinə həbs qətimkan tədbiri seçilib.
İş materiallarından məlum olur ki, uzun müddət gizli müşahidələr aparmış M.H.Hüseyinzadə 2023-cü ilin noyabr ayında xarici dövlətin Azərbaycandakı diplomatik nümayəndəliyinin Bakı şəhərində olan inzibati binasına silahlanmış vəziyyətdə terror aktı törətmək üçün soxulmağa cəhd edərkən DTX əməkdaşlarının keçirdiyi əməliyyat tədbirləri nəticəsində cinayət başında saxlanılaraq tərksilah edilib.
"Ynet"in əldə etdiyi məlumata görə, İranla əlaqəsi olduğu ehtimal edilən şübhəli diplomatik nümayəndəlik binasına girmək istəyərkən saxlanılıb.
Qeyd edək ki, bu barədə ilk xəbəri "Qafqazinfo" saytı yayıb.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.