BAKI, 16 noyabr — Sputnik. Qərb ölkələrinin bir çox insanların gözündə cəlbedici olan sərvətləri avropalıların və amerikalıların digər ölkələri həyasızcasına soymaq bacarığının nəticəsidir.
Bunu Rusiya Federasiya Şurasının Dövlət Suverenliyinin Müdafiəsi Komissiyasının sədri, Beynəlxalq Əlaqələr Komitəsinin sədr müavini, iqtisad elmləri doktoru Andrey Klimov deyib.
"Qərb dövlətlərinin sərvəti onların müstəmləkəçilik siyasətinin nəticəsidir. Onlar ağıllı olduqları üçün və ya başqalarından daha yaxşı olduqları üçün deyil, uzun müddət və həyasızcasına qarət etdikləri üçün zəngindirlər. Böyük Britaniya müstəmləkəçilik dövründə təkcə Hindistandan müasir pul baxımından 30 trilyon dollar dəyərində sərvət ixrac edib", - deyə senator Klimov bildirib.
Onun sözlərinə görə, bu gün dünyada bir müstəmləkə imperiyası var - ABŞ, lakin Vaşinqtonun Britaniya və Avropa Birliyi timsalında vassalları var. Bu qrup ölkələr qloballaşma və dollarlaşma yolu ilə dünyanın qalan hissəsini soyğunçuluq meydanı kimi görürlər.
"[Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi] Josep Borrelin dediyi kimi, onların orada bağları var, dünyanın qalan hissəsi isə cəngəllikdir. Cəngəllik olduğu üçün də istədiyinizi edə bilərsiniz. Qloballaşma bir çox cəhətdən neokolonializmdir. Hər şey dollara satılanda bu, başqa ölkələrə deyil, ABŞ-a sərf edir. Dünyanın hər yerindən bütün elm adamları Birləşmiş Ştatlara gətirildikdə, bu da yalnız bir ölkəyə sərf edir. Rusiya bu neokolonializmlə mübarizə prosesinə rəhbərlik edə bilər, lakin bu, kollektiv fəaliyyət olmalıdır", - deyə Andrey Klimov qeyd edib.