BAKI, 11 noyabr — Sputnik. Rusiyalılar xüsusi mehribanlıqları ilə seçilirlər. Onlar həmişə kömək etməyə hazırdırlar. Eyni şeyi avropalılar haqqında demək olmaz.
Bunu Avstriyanın keçmiş xarici işlər naziri Karin Knaysl "RT" telekanalına müsahibəsində söyləyib.
Onun sözlərinə görə, Rusiyada təsadüfi yoldan keçənə yaxınlaşıb istiqamət istəyə bilərsiniz. İnsanlar xarici dilləri bilməsələr də, həmişə köməyə gələcəklər. Həm də üzlərində təbəssümlə kömək edəcəklər.
"Avstriyada və ya Almaniyada belə bir vəziyyətdə dərhal əcnəbilərə qarşı düşmənçilik hissi hiss edə bilərsiniz", - deyə Knaysl sözünə davam edib.
Rusiyalılar daha dürüstdürlər, onlar bir insan haqqında fikirlərini onun öz üzünə söyləməyə hazırdırlar. Avstriya və Mərkəzi Avropada isə insanlar daha çox yayınma mövqelərini tuturlar. Odur ki, keçmiş nazirin sözlərinə görə, bir gün dostlarının və ya tanışlarının səni kürəyindən bıçaqlayacağını gözləmək olar.
Xatırladaq ki, daha əvvəl Knaysl Rusiyanı öz evi hesab etməyə başladığını bildirmişdi.