BAKI, 7 noyabr — Sputnik. Bu gün dünya bazarlarında neft qiymətləri ucuzlaşıb.
Dünyanın ən böyük neft istehlakçısı olan Çindən gələn qarışıq iqtisadi məlumatlar neftin ucuzlaşmasına səbəb olub.
"Brent" markalı neft 47 sent və ya 0,55% ucuzlaşaraq 84,71 dollar, ABŞ-nin Qərbi Texas nefti 37 sent və ya 0,46% azalaraq 80,45 dollar olub.
"Azeri Light" markalı Azərbaycan neftinin 1 barelinin qiyməti 0,04 dollar, yaxud 0,04% artaraq 90,71 dollar təşkil edib.
Qeyd edək ki, dünən Səudiyyə Ərəbistanı və Rusiyanın ilin sonuna qədər əlavə könüllü neft tədarükünün azaldılmasına dair öhdəliklərini təsdiqləməsindən sonra neft qiymətləri bahalaşıb.
Noyabr-dekabr aylarında Çində neft emalı müəssisələrinin xam neft dövriyyəsinin azaldılması gözləntiləri neftə tələbi məhdudlaşdıra və qiymət enişlərini daha da gücləndirə bilər.
Səudiyyə Ərəbistanının Energetika Nazirliyi Krallığın 2023-cü ilin iyulunda tətbiqinə başladığı və daha sonra 2023-cü ilin dekabr ayının sonuna qədər uzadılan gündəlik bir milyon barel könüllü ixtisarı davam etdirəcəyini açıqlayıb. Beləliklə, Krallığın hasilatı 2023-cü ilin dekabr ayında gündəlik təxminən 9 milyon barel olacaq. Hasilatın bu əlavə könüllü azaldılması OPEC+ alyansı tərəfindən görülən ehtiyat tədbirlərini gücləndirmək, habelə neft bazarlarının sabitliyini və tarazlığını dəstəkləmək məqsədi daşıyır.
Xatırladaq ki, "Azeri Light" neftinin ən aşağı qiyməti 2020-ci il aprelin 21-də (15,81 dollar), maksimal qiyməti isə 2008-ci ilin iyulunda (149,66 dollar) qeydə alınıb.
2022-ci ildə "Azeri Light" markalı neftin bir barelinin orta satış qiyməti 103,58 dollar təşkil edib. 2021-ci ilin göstəricisi ilə müqayisədə ötən il "Azeri Light" nefti 44,6% bahalaşıb.
2022-ci il ərzində "Azeri Light" markalı neftin ən yüksək qiyməti 8 mart tarixində bir barel üçün 135,99 dollar, ən aşağı qiyməti isə 8 dekabr tarixində 78,07 dollar olub.