BAKI, 12 oktyabr — Sputnik. Türkiyənin daha iki atom elektrik stansiyasına ehtiyacı olacaq, Rosatom bu layihələrə maraq göstərir. Bunu Türkiyənin energetika naziri Alparslan Bayraktar bildirib.
"Hazırda Rosatom ilk Akkuyu stansiyamızı tikir. Amma bizə ikinci və üçüncü stansiya lazım olacaq və Rosatom bu layihələrlə işləməkdə maraqlı olduğunu nümayiş etdirir. Bizə nüvə enerjisi lazımdır, tələbatımız artır, təmiz enerji mənbələrinə ehtiyacımız var. Bizim çox iddialı məqsədlərimiz var", - nazir Rusiya Enerji Həftəsi çərçivəsində "Texnoloji suverenlik və aşağı karbonlu enerji: sabaha baxış" sessiyasında çıxış edərkən deyib.
Türkiyənin ilk atom elektrik stansiyası olan "Akkuyu"nun tikintisi Rusiya-Türkiyə əməkdaşlığının ən böyük birgə layihəsinə çevrilib. 1200 MVt gücündə Rusiyanın qabaqcıl VVER-1200 reaktorları ilə dörd enerji blokunun hamısının istismara verilməsindən sonra hər stansiyanın ildə təxminən 35 milyard kilovat-saat enerji istehsal edəcəyi və Türkiyənin elektrik enerjisinə olan tələbatının 10%-ə qədərini ödəyəcəyi planlaşdırılır. İlk enerji blokunun işə salınması 2024-cü ilə planlaşdırılır.
Akkuyu AES qlobal nüvə sənayesində "tik-sahib ol-işlət" modelindən istifadə etməklə həyata keçirilən ilk layihədir. Layihənin dəyəri təxminən 20 milyard dollardır. Akkuyu nüvə enerjisində bütün müasir beynəlxalq təhlükəsizlik tələblərinə cavab verir.
Oktyabrın əvvəlində Bayraktar bildirib ki, "Rosatom" tərəfindən inşa edilən Akkuyu AES-in birinci blokunda elektrik enerjisi istehsalına 29 oktyabr 2024-cü ildə başlana bilər.
Oktyabrın 11-dən 13-dək Moskvada Rusiya Enerji Həftəsi keçirilir. RİA Novosti forumun informasiya tərəfdaşı kimi çıxış edir.