BAKI, 6 oktyabr — Sputnik. Moskva taxıl sövdələşməsi ilə bağlı məsələləri müzakirə etməkdən imtina etmir, lakin Rusiyanın tələbləri yerinə yetirilmir. Bunu Rusiya Federasiyası xarici işlər nazirinin müavini Sergey Verşinin deyib.
"Kənd təsərrüfatı məhsullarımız və gübrələrimiz sanksiyalara məruz qalmasın, sonra İstanbul razılaşmalarının bəzi digər hissələrinin bərpasından danışmaq olar. Bundan əvvəl il ərzində bizə vədlər verilib, amma yerinə yetirilməyib.
"Bu məsələləri müzakirə etməklə, biz göstərməyə çalışırıq ki, bundan həm də Rusiyaya qarşı informasiya hücumu üçün istifadə olunur", – Verşinin "Rossiya Seqodnya" media qrupunda keçirdiyi mətbuat konfransında deyib.
2022-ci ilin iyulunda bağlanmış taxıl sazişi - Ukrayna taxılını daşıyan gəmilər üçün dəhliz haqqında razılaşma iyulun 18-də dayandırılıb. Rusiya Federasiyası Türkiyə, Ukrayna və BMT-ni onun uzadılmasına etirazı barədə xəbərdar edib.
Rusiya Prezidenti Vladimir Putin qeyd edib ki, Rusiya ilə bağlı razılaşmanın şərtləri BMT-nin səylərinə baxmayaraq yerinə yetirilməyib, çünki Qərb ölkələri öz vədlərini yerinə yetirmək niyyətində deyillər.
Rusiya lideri dəfələrlə bildirib ki, Qərb Ukrayna taxılının böyük hissəsini öz dövlətlərinə ixrac edib və sazişin əsas məqsədi - ehtiyacı olan ölkələrə taxıl tədarükü olub, bu isə heç vaxt həyata keçirilməyib.
Buna baxmayaraq, Moskvada taxıl sazişinə dərhal qayıtmağa hazır olduqlarını bildiriblər, lakin bu, Rusiyaya aid olan hissədə həyata keçirilməlidir. Rusiyanın xarici işlər naziri Sergey Lavrov sentyabrın 23-də bildirib ki, taxıl sazişinin Rusiya hissəsi fəaliyyətə başlayan kimi Ukrayna hissəsi də həmin gün bərpa olunacaq.