BAKI, 3 oktyabr — Sputnik. Pakistan hökuməti ölkədə qeyri-qanuni yaşayan 1,1 milyon əcnəbini terrorçulara köməklik və digər qanunsuz fəaliyyətlərdə iştirak etdiklərinə görə ölkədən çıxarmaq qərarına gəlib. Bu barədə Associated Press məlumat yayıb.
"Birinci mərhələdə qeyri-qanuni sakinlər, ikinci mərhələdə Əfqanıstan vətəndaşlığı olanlar, üçüncü mərhələdə isə yaşayış icazəsini təsdiq edən sənədləri olanlar çıxarılacaq", - agentliyin mənbəsi bildirib.
Qeyri-qanuni yaşayan Əfqanıstan vətəndaşlarının ölkədən çıxarılması planı təsdiqlənib, çünki bu qrup vətəndaşlar terrorçuların maliyyələşdirilməsi, yardımçılığı və qaçaqmalçılığı ilə məşğuldurlar və 700 min əfqan üçün Pakistanda yaşamaq üçün sənədlər yenilənməyib.
"Ölkədə yaşayan bütün əfqanların sənədlərinin yoxlanılması ilə yanaşı, onların qeydiyyatı üçün təqdim edilmiş müraciətlərə operativ şəkildə baxılması da tapşırılıb", - mənbə bildirib.
Bundan əvvəl KİV-lər bildirmişdilər ki, Pakistan hakimiyyəti qeyri-qanuni qaçqınlara ölkəni tərk etmək təklifini tezliklə elan etmək niyyətindədir, əks halda onlar mühakimə olunacaqlar. KİV-in məlumatına görə, hakimiyyət orqanları Pakistanı tərk etmək üçün onlara bir ay vaxt verəcək, bu müddətdən sonra hüquq-mühafizə orqanları böyük əksəriyyətinin əfqan olduğu bildirilən bu cür qeyri-qanuni mühacirləri müəyyən edib deportasiya etmək üçün bütün ölkədə genişmiqyaslı əməliyyatlara başlayacaq.
Birləşmiş Millətlər Təşkilatının son məlumatlarına görə, təxminən 1,3 milyon əfqan qeydiyyatdan keçmiş qaçqındır və daha 880,000 nəfər Pakistanda qalmaq üçün hüquqi statusa malikdir. Eyni zamanda, Pakistan hakimiyyəti hesab edir ki, Əfqanıstanda hakimiyyət dəyişikliyindən bəri 400 mindən çox insan Pakistana qeyri-qanuni yollarla daxil olub.
Pakistan polisinin rəsmi məlumatlarına görə, sentyabrın əvvəlindən təkcə Kəraçidə ən azı 700 əfqan həbs edilib, bu avqustla müqayisədə 10 dəfə çox, digər şəhərlərdə isə yüzlərlə əfqan həbs edilib. Öz növbəsində əfqanlar deyirlər ki, həbslər heç bir fərq qoyulmadan həyata keçirilir.