BAKI, 29 sentyabr — Sputnik. "Bu gün Horadizdən Zəngilana dəmir yolunun inşası fəal fazadadır və nəqliyyat dəhlizinin bu mühüm hissəsi tezliklə hazır olacaq".
Sputnik Azərbaycan xəbər verir ki, bu barədə Azərbaycan Prezidenti İlham Əliyev sentyabrın 29-da Zəngilanda keçirilən "Davamlı şəhərlər iqtisadi inkişafın hərəkətverici və bərabərsizliklərlə mübarizə aparan qüvvəsi kimi" mövzusunda 2-ci Milli Şəhərsalma Forumunun açılış mərasimində çıxışı zamanı bildirib.
"Bu, Azərbaycanın əsas ərazisini Naxçıvan Muxtar Respublikası ilə birləşdirəcək layihədir. Oradan isə həmin dəmir yolu İran və Türkiyəyə keçəcək və nəhayət Avropaya çatacaq. Biz tezliklə bu layihəni istifadəyə verəcəyik. Yəni, Zəngilan çox vacib nəqliyyat mərkəzi olacaq", - dövlət başçısı əlavə edib.
İpək yolu üzərində yerləşən Azərbaycan vaxtilə Mərkəzi Asiya və Cənubi Qafqazın iqtisadi münasibətlərində mühüm rol oynayıb. Bu gün Zəngəzur dəhlizi istiqamətində görülən işlər tam miqyasda gedir.
Onun sözlərinə görə, Zəngəzur dəhlizinin açılması Şərqlə Qərbin arasındakı məsafəni qısaldacaq.