BAKI, 18 sentyabr — Sputnik. Rusiya Federasiyasının xarici işlər naziri Sergey Lavrov BMT Baş Assambleyasının 78-ci sessiyasının "kənarında" BRİKS ölkələrinin xarici işlər nazirlərinin iclasında iştirak edəcək və həmkarlarını Rusiyanın qarşıdan gələn sədrliyi ilə bağlı planlar barədə məlumatlandıracaq. Bu barədə Rusiya Xarici İşlər Nazirliyi məlumat yayıb.
İclas iştirakçıları cari beynəlxalq problemlər, o cümlədən BMT Baş Assambleyasının 78-ci sessiyasının gündəliyində duran məsələlər ətrafında fikir mübadiləsi aparacaqlar. Nazirlər BRİKS formatında qarşılıqlı fəaliyyəti, o cümlədən aparıcı çoxtərəfli platformalarda koordinasiyanın gücləndirilməsi imkanlarını və assosiasiyanın XV sammitinin (Yohannesburq, 22-24 avqust) qərarlarının həyata keçirilməsini müzakirə edəcəklər.
"Lavrov həmkarlarını Rusiyanın 2024-cü ildə assosiasiyaya qarşıdakı sədrliyi ilə bağlı planları barədə məlumatlandıracaq", - Rusiya XİN-in məlumatında qeyd olunub.
Xatırladaq ki, avqustun 22-24-də Cənubi Afrika Respublikasının sədrliyi ilə Yohannesburqda Çin, Hindistan, Braziliya və CAR liderlərinin qatıldığı BRİKS-in növbəti sammiti keçirilib, Rusiyanı Lavrov təmsil edib.
Rusiya prezidenti Vladimir Putin sammitdə videokonfrans vasitəsilə iştirak edib.
Sammit zamanı Cənubi Afrika Respublikasının Prezidenti Siril Ramafosa Argentina, Misir, İran, Efiopiya, Birləşmiş Ərəb Əmirlikləri və Səudiyyə Ərəbistanını BRİKS-ə qoşulmağa rəsmi dəvət etdiyini açıqlayıb. O bildirib ki, BRİKS-ə qoşulan yeni ölkələrin tamhüquqlu üzvlüyü 2024-cü il yanvarın 1-dən başlayacaq.